Hinn 17 ára gamli Karmelo Anthony hefur verið ákærður fyrir morð af fyrstu gráðu eftir að hafa stungið Austin Metcalf, einnig 17 ára, til bana á frjálsíþróttamóti í Texas þann 2. apríl.
Atvikið átti sér stað á héraðsmóti University Interscholastic League en Metcalf bað Anthony að færa sig eftir að sá síðarnefndi var á svæði þeirra í leyfisleysi.
Sjálfsvörn virtist trúverðug – þangað til nú
Anthony hefur alla tíð játað að hafa banað Metcalf en alltaf borið fyrir sig sjálfsvörn.
Í fyrstu var sú vörn talin trúverðug og fjölskylda hans hélt því fram að frásögn fjölmiðla og opinber umræða væri „röng, ósanngjörn og skaðleg“.
Á GiveSendGo-síðu sem stofnuð var til að safna fé honum til varnar hans höfðu safnast meira en 530.000 dollarar sem eru um 65 milljónir íslenskra króna.
Ný sönnunargögn breyttu öllu
Saksóknari Collin-sýslu, Greg Willis, sagði á blaðamannafundi á þriðjudag að gögnin sem lögð voru fyrir kviðdóm bentu til þess að um væri að ræða morð af fyrstu gráðu.
„Í dag tók ég saman helstu atriði málsins og óskaði eftir ákæru sem kviðdómurinn samþykkti,“ sagði hann.
Nýjar myndbandsupptökur sem lögreglan aflaði í kjölfarið hafa orðið til þess að sjálfsvörn Anthony sem áður þótti nokkuð trúverðug virðist nú verulega dregin í efa.
Frjáls og lifir lúxuslífi – þrátt fyrir ákæruna
Málið vakti reiði víða eftir að Anthony var látinn laus gegn tryggingu upp á 250.000 dali og virtist lifa góðu lífi í glænýju og rándýru húsi sem keypt var fyrir peninginn sem safnast hafði í lögfræðisjóð hans.
Samkvæmt heimildum fjölmiðla er mánaðarleiga í húsinu um 3.500 dali og nágranni greindi frá því að Anthony hafi keypt sér nýjan bíl eftir árásina.
Tryggingarfjárhæðin hafði nefnilega verið lækkuð úr einni milljón dollara því tekið var tillit til fjárhagsörðugleika fjölskyldunnar.
Dómurinn gæti verið lífstíðarfangelsi
Lögmaður Anthony, Mike Howard, sendi frá sér yfirlýsingu eftir ákæruna þar sem hann hélt því áfram fram að skjólstæðingur sinn hefði verið að verja sig.
„Við erum sannfærð um að þegar allar staðreyndir liggja fyrir og sagan er sögð til fulls, muni dómnefndin komast að réttri niðurstöðu og réttlætið ná fram að ganga,“ sagði hann.
Ef Anthony verður sakfelldur gæti hann átt yfir höfði sér lífstíðarfangelsi.