University of Pennsylvania (UPenn) hefur samþykkt að banna líffræðilegum körlum, þar með talið trans konum, að keppa í kvennaíþróttum og mun afmá öll met og titla sem Lia Thomas vann á meðan Thomas keppti með sundliði skólans.
Þetta er hluti af sátt sem háskólinn gerði við Menntamálaráðuneyti Bandaríkjanna, sem komst að þeirri niðurstöðu að þátttaka Thomas hefði brotið gegn Title IX, lögum sem banna mismunun á grundvelli kyns í menntastofnunum.
Ákvörðunin markar endalok fyrirferðamikils máls sem snérist um réttindi kvenna í íþróttum og setur fordæmi fyrir aðrar menntastofnanir sem glíma við álíka mál.
Háskólinn viðurkennir að sumar konur hafi verið beittar órétti
Í yfirlýsingu sem UPenn birti þriðjudaginn 1. júlí sagði rektor skólans:
„Þótt stefna okkar á keppnistímabilinu 2021–2022 hafi verið í samræmi við reglur NCAA á þeim tíma, viðurkennum við að sumar íþróttakonur urðu fyrir samkeppnislegu óréttlæti vegna þessara reglna. Við biðjum þær afsökunar.“
Skólinn hefur nú þegar leiðrétt vefsíðu sína, þar sem met Thomas í 100, 200 og 500 metra skriðsundi eru ekki lengur skráð.“
Formlegar aðgerðir samkvæmt samkomulagi
Samkvæmt yfirlýsingu Menntamálaráðuneytisins felur samkomulagið í sér að UPenn:
- Skilar öllum titlum og metum í sundi til þeirra kvenna sem töpuðu fyrir Liu Thomas.
- Sendir persónuleg afsökunarbréf til allra þeirra sundkvenna sem urðu fyrir skaða.
- Tekur upp líffræðilega skilgreiningu á hugtökunum „karl“ og „kona“ samkvæmt nýrri stefnu ríkisstjórnar Trumps.
- Lofar því opinberlega að ekki verði lengur leyft að líffræðilegir karlmenn taki þátt í kvennaíþróttum innan skólans.
Trump-stjórnin fagnar: „Sigur fyrir konur og stúlkur“
Menntamálaráðherra, Linda McMahon, sagði í yfirlýsingu:
„Ráðuneytið fagnar því að UPenn leiðrétti fyrri óréttlæti gegn konum og stúlkum. Við munum halda áfram að tryggja að Title IX sé réttilega framfylgt.“
Fyrrverandi sundkonan Riley Gaines, sem hefur verið áberandi andstæðingur þátttöku trans kvenna í kvennaíþróttum, þakkaði Donald Trump forseta og spurði kaldhæðnislega á samfélagsmiðlum: „Are pigs flying?“
Hún hóf baráttu sína eftir að hafa deilt búningsklefa með Lia Thomas á NCAA-mótinu árið 2022 og misst titla og styrki til Thomas.