Í nýrri heimildarmynd sem ber titilinn The Murder That Shook Iceland: Case of Birna Brjansdottir er fjallað um eitt átakanlegasta sakamál Íslandssögunnar.
Myndbandið er birt á Youtube rásinni Amigurumi Atölye TR , og segir sögu 20 ára gömlu Birnu Brjánsdóttur, sem hvarf sporlaust í Reykjavík og fannst síðar myrt.
Hvarf hennar vakti ótta og óvissu um allt land og leiddi til einnar umfangsmestu leitaraðgerðar Íslandssögunnar.
Nokkrum dögum síðar urðu verstu spár að veruleika þegar lík hennar fannst.
Með ítarlegri rannsókn, myndbandsupptökum og réttarrannsóknum tókst lögreglu að rekja síðustu skref Birnu og komast að sannleikanum um glæpinn.
Heimildarmyndin dregur fram þær óhugnanlegu staðreyndir sem fylgdu málinu og varpar ljósi á áfallið sem þetta morð olli íslensku samfélagi.
Ekki er vitað hvort myndin er unnin með samþykki fjölskyldu Birnu en um 30 þúsund manns hafa horft á myndina þegar þetta er skrifað.