Bandaríska þingkonan Ilhan Omar, fulltrúi Minnesota á Bandaríkjaþingi, sætir nú rannsókn vegna fjármálaupplýsinga sem sýna að skráðar eignir tengdar fjölskyldu hennar hafi aukist gríðarlega á skömmum tíma.
Samkvæmt nýjustu eignayfirlýsingu hennar jukust eignir sem tengjast tveimur fyrirtækjum, í eigu eiginmanns hennar Tim Mynett, úr því að vera metnar á bilinu 1 til 1.000 dollara í allt að 30 milljónir dollara á einu ári.
Mikil hækkun á virði tveggja fyrirtækja
Annað fyrirtækið, Rose Lake Capital LLC, er fjárfestinga- og ráðgjafafyrirtæki með aðsetur í Washington DC.
Í eignayfirlýsingu fyrir árið 2024 er virði þess skráð á bilinu 5 til 25 milljónir dollara. Árið áður var sama eign skráð á bilinu 1 til 1.000 dollara.
Ilhan Omar skráir eignina sem samstarfstekjur og segir að hún fái sjálf engar tekjur frá fyrirtækinu.
Tim Mynett er forstjóri og meðstofnandi Rose Lake Capital og hefur gegnt því hlutverki frá árinu 2022.
Hitt fyrirtækið, ESTCRU LLC, er víngerð í Santa Rosa í Kaliforníu.
Í eignayfirlýsingu fyrir árið 2023 var virði þess skráð á bilinu 15.001 til 50.000 dollara.
Í nýjustu skráningu er virðið metið á bilinu 1 til 5 milljónir dollara.
Eftirlitssamtök hefja skoðun
Í kjölfar þessara upplýsinga hefur National Legal and Policy Center, félagasamtök sem fylgjast með siðferði og fjármálum opinberra embættismanna, staðfest að samtökin séu að skoða málið.
Formaður samtakanna, Peter Flaherty, hefur staðfest að athugun sé hafin á fjármálum þingkonunnar.
Upplýsingum um fyrirtækið eytt af netinu
Athygli hefur einnig vakið að stafræn umgjörð Rose Lake Capital virðist hafa verið dregin verulega saman.
LinkedIn síða fyrirtækisins hefur verið tekin niður og heimasíðan sýnir ekki lengur nöfn eða ferilskrár starfsmanna, heldur einungis almenna lýsingu á starfsemi fyrirtækisins.
Þetta gerðist stuttu eftir að farið var að skoða hina miklu svikastarfsemi á fé sem ætlað var í velferðarkerfið í fylkinu en enginn hefur fullyrt að bein tengsli séu þar á milli.
Einnig hefur verið bent á að stafrænt umsvif ESTCRU séu lítil miðað við það virði sem fyrirtækið er nú metið á.
Samfélagsmiðlar víngerðarinnar hafa verið óvirkir um nokkurt skeið og netverslun virðist óaðgengileg.
Fyrri deilur og samhengi í Minnesota
Omar og Mynett kynntust í kosningabaráttu hennar og gengu í hjónaband árið 2020.
Mynett starfaði þá sem pólitískur ráðgjafi og fyrirtæki hans þjónustaði kosningabaráttu hennar.
Árið 2022 var lögð fram kvörtun til alríkiskjörstjórnar um mögulega misnotkun kosningafjár, en Omar hafnaði þeim ásökunum og sagði samband þeirra hafa hafist eftir að faglegu samstarfi lauk.
Ný umræða um fjármál hennar kemur jafnframt fram á sama tíma og Minnesota stendur frammi fyrir umfangsmiklu svikam á sviði félagsþjónustu, þar sem alríkisyfirvöld rannsaka mál sem metið er að geti numið allt að 9 milljörðum dollara.
Tugir einstaklinga hafa verið ákærðir í tengslum við þau mál.
Ilhan Omar hefur áður sagt að skortur á aðhaldi í heimsfaraldrinum hafi skapað aðstæður þar sem misnotkun kerfa varð möguleg.
Hún og eiginmaður hennar hafa ekki svarað opinberlega spurningum fjölmiðla um nýjustu eignayfirlýsingarnar.