Hlynur Þórisson segir að flugfélagið Play hafi brugðist honum á viðkvæmasta augnabliki lífs síns.
Þann 2. apríl 2025 átti hann bókað flug með PLAY, með dýrustu mögulegu bókun, eða sveigjanlegum miða (flex) og forfallatryggingu en Hlynur þurfti á endanum að fresta för sinni vegna mjög alvarlegra veikinda.
Hann hafði þá verið lagður inn á gjörgæslu með sýkingu í hjarta, lá milli heims og helju lengi og var sagt að hann hefði í raun verið stálheppinn að lifa af.
Hann fékk þá tilkynningu frá PLAY um að bókunin væri orðin ógild og aðeins væri hægt að endurgreiða flugvallargjöld, samtals 1.732 krónur
Þremur dögum fyrir brottför, þann 31. mars, hafði fjölskylda Hlyns samband við PLAY og tilkynnti forföll hans vegna veikinda.
Í skriflegu svari frá þjónustufulltrúa, sem skrifaði undir nafninu Drea, var sagt að Hlynur gæti breytt dagsetningu flugs allt að einni klukkustund fyrir brottför, svo lengi sem ekki væri búið að innrita farþega. Þá kom einnig fram að breytingarbeiðni væri „í vinnslu“ (mál númer XXXXX).
„Málið í vinnslu“ – en ekkert gert
Þrátt fyrir þessi skilaboð virtist ekkert hafa gerst innan kerfis PLAY. Þann 14. apríl, tólf dögum eftir upprunalegt flug, reyndi Hlynur að fá nýjan flugtíma, þar sem hann hafði þá fengið leyfi til að ferðast. Hann fékk þá tilkynningu frá PLAY um að bókunin væri orðin ógild og aðeins væri hægt að endurgreiða flugvallargjöld, samtals 1.732 krónur.
Í svörum PLAY kom fram að engin breyting hefði verið framkvæmd formlega í gegnum MyPLAY aðgang Hlyns. Þeir sögðu að engin dagsetning hefði verið valin og því hefði engin bókun breyst í kerfinu. Þrátt fyrir að Hlynur hafi lagt fram gögn, þar á meðal staðfestingu á veikindum sínum með læknisvottorði, taldi PLAY málið afgreitt sem „flug sem farþegi missti af“.
„Ég og fjölskylda mín settum okkur í samband við þau til að tilkynna þeim að ég kæmist ekki í þetta flug, til að virkja forfallatrygginguna. Þau vissulega senda mér póst sem segir að ég geti breytt fluginu allt að einni klukkustund fyrir brottför, sem er voða þægileg og eflaust frábær þjónusta fyrir þá sem geta nýtt sér hana, en ég vissi ekkert hvenær ég gæti flogið aftur, þess vegna var ég að tilkynna þeim þetta.“ segir Hlynur sem taldi sig með þessu hafa virkjað þá forfallatryggingu sem hann hafði keypt með dýrari flugmiða.
Bað um að farið yrði yfir málið
Hann kallaði eftir því að málið yrði tekið upp á ný af einhverjum yfirmanni hjá félaginu og ítrekaði að fjölskylda hans hefði átt í samskiptum við PLAY á meðan hann lá veikur á spítala og hvorki gat né mátti eiga samskipti gegnum síma eða tölvu.
Hlynur segist vonsvikinn með þjónustuver PLAY og segir að honum finnist miður að þegar í ljós koma að óvíst væri hvenær hann gæti ferðast, að þá hafi ættingjum hans ekki verið boðnar aðrar lausnir.
Skömmu síðar var samtalinu lokað með tilkynningu frá PLAY um að frekari aðstoð yrði ekki veitt í þessu máli
Hann nefnir dæmi að hægt hefði verið að bjóða möguleikann að bóka flug eins langt fram í tímann, sem hægt væri, og breyta svo síðar í þá dagsetningu sem hann gæti nýtt sér þar sem hann gat ómögulega vitað á þessum tíma hvenær hann ætti eftir að verða flughæfur á ný.
Flugfélagið hafi vitað af þessu ástandi hans og hversu ómögulegt það var fyrir hann eða ættingja hans að vita hvenær hann gæti ferðast, en samt buðu þau ekki upp á neinar lausnir.
17. apríl: PLAY lokar málinu formlega
Á föstudeginum langa, þann 17. apríl kl. 6:35 að morgni, fær Hlynur síðustu formlegu svör PLAY þar sem staðfest er að aðeins verði endurgreidd flugvallargjöld og að ekkert annað verði gert í málinu. Hann var beðinn um að senda upplýsingar til að staðfesta endurgreiðsluna, sem hann gerði.
Skömmu síðar var samtalinu lokað með tilkynningu frá PLAY um að frekari aðstoð yrði ekki veitt í þessu máli. Hlynur mótmælti harðlega, kallaði eftir skýringum frá stjórn félagsins og sagðist ætla að vekja athygli á málinu.
Í skilaboðum sínum til PLAY sagði hann að hann hefði treyst félaginu, keypt dýrasta mögulega miða og sent inn öll gögn innan tilskilins frests, en fengið aðeins þögn, afsakanir og að lokum 1.732 krónur til baka.
PLAY: „Engin beiðni um tiltekna dagsetningu“
Í svörum PLAY til Hlyns kom fram að félagið taldi sig hafa veitt réttar upplýsingar og að breyting hafi ekki farið í gegn þar sem ekki hafi borist skýr beiðni um nýja ferðadagsetningu innan tímamarka.
„Þau vilja sem sagt meina að ég hafi í raun bara viljandi hent mínum flugmiða í ruslið með einhverju meintu aðgerðaleysi. Þrátt fyrir ítrekuð samskipti okkar vegna þessarar sjúkralegu minnar. Það er undarleg túlkun og að mínu mati alveg sérlega tillitslaust. En það er mín skoðun.“ segir Hlynur.
Í síðustu samskiptum Hlyns og Play er ljóst að flugfélagið telur málið útrætt og var Hlyni þá vísað á formlegt kvartanakerfi og samtalinu síðan lokað eftir að endurgreiðsla flugvallargjalda hafði verið staðfest.
Hlynur segist verulega sár yfir þessum málalokum og furðar sig á að fyrirtæki í þessum bransa geti leyft sér að koma svona fram við borgandi kúnna.
„Eflaust eru þeir búnir að tryggja sig fyrir svona framkomu með einhverjum skilmálum í smáa letrinu, en sjálfum finnst mér þeim þetta til mikillar skammar. Þegar ég lá á gjörgæslu nær dauða en lífi huggaði ég mig við það að hafa keypt dýrasta miðann með bestu forfallatryggingunni, en þeir ná samt að taka svona snúning á mér.“ segir Hlynur að lokum.
Von er á svörum frá PLAY innan skamms
Nútíminn hefur borið málið undir samskiptastjóra flugfélagsins PLAY sem sagðist ætla að skoða málið gaumgæfilega og gefa Nútímanum yfirlýsingu um leið og hún er tilbúin.
Nútíminn mun birta svör flugfélagsins þegar þau berast.
UPPFÆRT KL 12:00 Play hefur brugðist við og býður Hlyni fulla endurgreiðslu. Sjá frétt hér fyrir neðan.
PLAY býður Hlyni fulla endurgreiðslu eða nýtt flug vegna vandræða hans