Móðir nemanda í Fjölbrautaskólanum í Breiðholti hefur sent Nútímanum verkefni úr áfanga sem ber heitið „Íslenska fyrir erlenda nemendur“. Hún segist algerlega slegin yfir því að í stað hefðbundinnar tungumálakennslu sé nemendum kennt efni um kynvitund, trans málefni, „kynjakönnuði“ og fleira í þeim dúr.
Að sögn móðurinnar er ekki einu sinni um kynjafræðiáfanga að ræða heldur íslenskuáfanga ætlaðan erlendum nemendum. Hún spyr því hvers vegna slíkt efni sé tekið fyrir í tungumálanámi í stað þess að leggja megináherslu á orðaforða, málfræði og hefðbundna lesskilnings- og ritunarkennslu.
„Sonur minn er að reyna að læra tungumálið og í áfanga sem heitir Íslenska fyrir erlenda nemendur. Í stað þess að læra almennilega íslensku fær hann verkefni um kynvitund og trans málefni,“ segir móðirin og bætir við að hún upplifi þetta sem pólitískt hlaðið efni.
Spurningar um kynvitund og ritgerð um jafnrétti
Í verkefnahefti sem Nútíminn hefur undir höndum má sjá umfjöllun um hugtök á borð við sískynja, trans, kynsegin og kynama og sagt frá því hvernig sum börn verða eins konar „kynjakönnuðir“. Nemendur eiga meðal annars að svara spurningum í heilum setningum eins og: „Hvað er að vera sískynja?“, „Hvað er að vera trans?“ og „Hvað er kynami?“
Í öðrum hluta verkefnisins, undir yfirskriftinni „Jafnrétti og réttlæti“, eiga nemendur að skrifa 170 orða ritgerð um jafnrétti kynjanna, hvers vegna mikilvægt sé að ná því og hvaða leiðir séu bestar til að tryggja það. Þar er jafnframt gerð krafa um að nota tiltekin markorð og skipta textanum í efnisgreinar.
Móðirin segir að sonur hennar hafi upplifað verkefnið sem þrýsting um að taka afstöðu til tiltekins málaflokks en að það sé þó miklu verra að þarna sé verið að kenna allt annað en íslensku og að sonur hennar sé bæði reiður og sár yfir því þar sem hann er að leggja hart að sér við að læra tungumálið.
Spurning um forgangsröðun í tungumálanámi
Að mati móðurinnar ætti meginmarkmið áfangans að vera að styrkja íslenskukunnáttu nemenda sem hafa annað móðurmál. „Ef þetta er íslenskuáfangi fyrir erlenda nemendur, af hverju er þá verið að leggja svona mikla áherslu á þetta efni?“ spyr hún.
Hún segist vera af erlendum uppruna og upplifi sig algerlega eina í baráttunni. Hún óttist að kvartanir geti haft neikvæðar afleiðingar fyrir son sinn og hafi því hvatt hann til að klára verkefnið þrátt fyrir óánægju en hún vilji ekki koma fram undir nafni af ótta við að syni hennar verði mismunað.
Ekki hefur enn náðst í FB vegna málsins en fréttin verður uppfærð ef það tekst.
