Ingvar Smári Birgisson, lögmaður og stjórnarmaður hjá RÚV, segir í nýjum þætti Spjallsins með Frosta Logasyni, að pólitísk slagsíða og skortur á fjölbreytni í sjónarhornum hafi til lengri tíma haft áhrif á fréttaflutning Ríkisútvarpsins.
Í viðtalinu ræðir hann m.a. afhjúpanir á hlutdrægni BBC, stöðu fjölmiðlunar á Íslandi og hvernig hræðsla við ásakanir um popúlisma hafi haft áhrif á umfjöllun um innflytjendamál.
Segir BBC sýna skýrar birtingarmyndir einhliða umfjöllunar
Ingvar Smári vísar til minnisblaðs frá BBC um innri ferla og gagnrýni á störf sjónvarpsstöðvarinnar og bendir á að algengasta vandamálið sé ekki falsfréttir heldur val á umfjöllunarefnum og sá vinkill sem tekinn er.
Hann nefnir dæmi þar sem BBC appið, sem sendir út tilkynningar um fjölbreyttar fréttir, geri þegar ekki þegar um er að ræða fréttir af innflytjendamálum.
„Þegar það kemur að innflytjendamálum þá sendir appið ekki út meldingar. Og þegar það gerir það, þá er það yfirleitt um að illa sé komið fram við innflytjendur,“ segir hann.
Að hans mati endurspeglar þetta hugsanlegt misræmi milli pólitískra skoðana starfsmanna og viðhorfa almennings.
„Langstærsti flokkur Bretlands, Reform, á nánast enga skoðanabræður innan BBC. Það segir sitt,“ bætir hann við.
Fullyrðir að hliðstæð þróun hafi orðið á RÚV
Ingvar Smári segir að svipuð krafa um hugmyndafræðilega slagsíða sé sjáanleg á RÚV.
Sú einhliða slagsíða birtist bæði í vali á fréttum og því hvernig ákveðin mál eru tekin fyrir.
„Það myndast svona skoðanaleg einsleitni. Menn fjalla óeðlilega mikið um tiltekin mál á kostnað annarra. Og þegar það er fjallað, þá eru vinklanir oft fyrirsjáanlegar,“ segir hann.
Hann gagnrýnir sérstaklega skort á faglegum efnistökum um atvinnulíðið gegnum tíðina.
Hann hrósar þó nýlegum breytingum og bendir á að gestir á borð við Konráð Guðjónsson og Hörð Ægisson hafi bætt umræðuna.
Gagnrýni á ummæli Gísla Marteins: „Alveg brjálæðislegt“
Í viðtalinu tekur Frosti dæmi um ummæli Gísla Marteins Baldurssonar sem sagði hlutverk RÚV mikilvægt til að „sporna gegn þjóðernisíhaldslegum öflum“.
Frosti segir slíkar yfirlýsingar mjög alvarlegar, enda komi þær frá áhrifamiklum einstaklingi innan stofnunarinnar.
„Það er alveg brjálæðislegt að maður með svona mikið dagskrárvald skuli segja þetta og láta eins og það sé eðlilegt.“
Að sögn Frosta hafi gagnrýni Snorra Mássonar á þessi ummæli verið afgreidd með hroka.
Ingvar segir þetta ekki ósanngjarna gagnrýni:
„Ég hef ekki séð ummælin sjálfur, en ég hef heyrt þetta. Ég myndi segja að það sé eðlilegt að RÚV stuðli að lýðræðislegri umræðu og það er eðlilegt að RÚV gegni ákveðnu hlutverki á þessari litlu eyju okkar, að því gefnu að við höfum ríkisútvarp yfir höfuð, í því að tryggja að það sé virk umræða um málin. Gagnrýni mín snýr að því að útvarpið hafi ekki axlað þá ábyrgð.“
Ákveðin hræðsla hamli umfjöllun um innflytjendamál
Ingvar Smári segir að fjölmiðlar, þar á meðal RÚV, hafi oft sneitt hjá umfjöllun um mál tengd innflytjendum.
Ástæðan sé hræðsla við að vera sakaður um að þjóna popúlistum.
„Þú ert farinn að spila mjög hættulegan leik sem blaðamaður ef þú hættir að fjalla um málefni vegna þess að einhver gæti stimplað það sem popúlisma,“ segir hann.
Hann gagnrýnir að flokkar sem sagðir séu popúlistískir taki oft óvinsæla slagi sem síðar reynast réttmætir.
„Kjósendur verða ósáttir þegar stóru flokkarnir hafa ekki brugðist við raunverulegum athugasemdum um innflytjendamál.“
Spyr hvers vegna sumir leiðtogar fáist ekki við sama stimpil
Ingvar bendir á að ítalski forsætisráðherrann Giorgia Meloni sé kölluð öfgahægri, á meðan Mette Frederiksen í Danmörku sleppi við slíka merkingu þrátt fyrir mjög harða stefnu í hælisleitendamálum.
„Frederiksen er með hörðustu hælisleitendastefnu í Evrópu, en hún fær ekki stimpilinn. Þetta er bara fáránlegt.“
Að hans mati hafi öll Evrópuríki þurft að herða reglur en að Ísland að Ísland sé hægt og rólega að fylgja þeirri þróun en bætir þó að við að „ við (Íslendingar) virðumst ætla reyna að tryggja að við endurtökum næstum öll sömu mistök og þessi ríki.“
Hægt er að sjá brot úr viðtalinu hér fyrir neðan en ef þú vilt sjá allan þáttinn geturðu tryggt þér áskrift á Brotkast.is hérna.