Ný skýrsla frá bresku heilbrigðisstofnuninni UK Health Security Agency (UKHSA) varar við því að ótti og áhyggjur af loftslagsbreytingum geti aukið líkur á vímuefnaneyslu og haft víðtæk áhrif á geðheilsu fólks.
Í skýrslunni, sem heyrir undir breska heilbrigðisráðuneytið, segir að íbúar geti orðið fyrir „loftslagsótta, loftslagsreiði og loftslagssorg“ og að þessar tilfinningar geti valdið „erfiðum loftslagstengdum tilfinningum“ sem hafi áhrif á daglegt líf.
Telja vímuefnaneyslu geta aukist
Samkvæmt skýrslunni geta tilfinningaleg vandamál tengd loftslagsmálum leitt til aukinnar neyslu vímuefna.
Í skýrslunni kemur fram að þessi vitund geti valdið „sorg, ótta, reiði, áhyggjum, lélegu skapi, svefntruflunum og kvíðaköstum“ og að „umhverfisbreytingar geti aukið geðræna vanlíðan og vímuefnaneyslu“.
Jafnframt er bent á að áhrifin geti verið langvinn, allt frá mánuðum upp í áratugi.
Hærra hitastig geti haft áhrif á geðheilsu
Skýrslan bendir einnig á að hækkandi hitastig geti aukið geðræn vandamál og að vænta megi aukins álags á heilbrigðiskerfið þegar áhrif hnattrænnar hlýnunar koma frekar fram.
Lea Berrang Ford, yfirmaður loftslags- og heilsudeildar UKHSA, sagði að loftslagsbreytingar væru þegar farnar að hafa áhrif á geðheilsu fólks, og að þessi áhætta myndi aukast eftir því sem veðuröfgar yrðu meiri.
„Það eru til raunhæfar og árangursríkar leiðir sem stjórnvöld og félagsþjónusta geta beitt til að tryggja betri vernd og stuðning,“ sagði hún.
Aðgerðir og virkni geti minnkað vanlíðan
Í skýrslunni er þó tekið fram að virk þátttaka í loftslagsmálum og aðgerðir til að draga úr áhrifum loftslagsbreytinga geti bætt líðan.
Að lokum kemur fram að börn þurfi tilfinningalegan stuðning samhliða því að fá tækifæri til að taka þátt í aðgerðum í loftslagsmálum.