Donald Trump Bandaríkjaforseti undirritaði í gær forsetatilskipun sem gerir yfirvöldum kleift að rannsaka og ákæra einstaklinga sem brenna bandaríska fánann.
Hæstiréttur Bandaríkjanna hefur þó áður kveðið upp dóma þar sem slík athöfn er talin njóta verndar stjórnarskrárinnar þar sem slíkur gjörningur er talinn falla undir tjáningarfrelsi.
Hæstiréttur hingað til dæmt fánabrennslu sem tjáningarfrelsi
Árið 1989 úrskurðaði Hæstiréttur í máli frá Texas, með fimm atkvæðum gegn fjórum, að fánabrennsla félli undir 1. viðauka stjórnarskrárinnar og væri því lögmæt pólitísk tjáning.
„Kveikir í fólki á hátt sem við höfum aldrei séð“
Trump sagði að brennsla fánans sé eingöngu til þess fallin að sýna landi og þjóð fyrirlitningu.
Samkvæmt forsetatilskipuninni verður refsing fyrir fánabrennslu eins árs fangelsi án möguleika á reynslulausn.
Útlendingar sem brenna bandaríska fánann geta jafnframt átt á hættu að missa vegabréfsáritun, dvalarleyfi, ríkisborgararétt eða önnur innflytjendaréttindi og verði líklega vísað úr landi.
„Mikil vanhugsun“ að dómstóllinn hafi leyft fánabrennur
Í texta tilskipunarinnar segir að fánabrennslu fylgi „sérstaklega móðgandi og ögrandi skilaboð“ og að hún geti hvatt til ofbeldis og óeirða.
Trump gagnrýndi jafnframt fyrri úrskurð Hæstaréttar harðlega og sagði að dómstóllinn sem tók ákvörðunina hefði verið „mjög sorglegur dómstóll“.
„Þeir kölluðu það tjáningarfrelsi,“ sagði forsetinn. „En það er annað sem skiptir meira máli. Það er kallað dauði.“
Trump hélt því fram að þegar fáninn sé brenndur „verði allt vitlaust“ og hópar fólks kunni að grípa til ofbeldis.