Elliði Vignisson, bæjarstjóri í Ölfusi, segir verðmætasköpun vera grundvallarforsendu þess að sveitarfélög geti staðið undir öflugri velferðarþjónustu. Þetta kemur fram í þættinum Spjallið með Frosta Logasyni á Brotkasti.
Í þættinum lýsir Elliði sér sem kapítalista og segir áherslur sínar alltaf hafa verið skýrar í rekstri. „Ég hef aldrei skilað ársreikningum í mínus, ekki eitt einasta skipti, hvorki gegnum COVID eða neitt. Áherslan er að reka samfélagið í plús,“ segir hann.
Aðspurður hvort hann hafi nokkru sinni rekið sveitarfélag með halla svarar hann einfaldlega: „Aldrei neitt rekið með halla.“
Hann segist árið 2018 hafa talið að reynsla hans af hallalausum rekstri myndi gera hann eftirsóttan í störf þar sem fjármálastjórn skipti máli. Raunin hafi hins vegar verið allt önnur. „Staðreyndin er sú að það var öllum drullu sama,“ segir hann og bendir á að margir hafi frekar verið að leita að málsvara fyrir samfélagið en stjórnanda með reynslu af góðum rekstri í fjármálum.
Tækifæri í Ölfusi
Elliði segir að þegar hann var hvattur til að sækja um starf í Ölfusi hafi hann farið að skoða stöðu sveitarfélagsins nánar. Hann nefnir 734 ferkílómetra landsvæði, nálægð við Reykjavík, aðgang að orku og köldu vatni og vaxandi inn- og útflutningshöfn. „Þetta var fyrir mér algjör dótakassi,“ segir hann og bætir við að gríðarleg tækifæri felist í uppbyggingu svæðisins.
Hann rifjar upp að erfiðir tímar í Þorlákshöfn hafi mótað hugsun bæjarbúa og vísar til orðatiltækisins „neyðin kennir naktri konu að spinna“. Sú reynsla hafi skapað jarðveg fyrir sókn og nýsköpun. Hann segir bæjarstjórnina hafa verið einhuga og einbeitta í því að nýta tækifærin og skapa verðmæti fyrir samfélagið.
Fyrst þarf að baka kökuna
Að mati Elliða er verðmætasköpun undirstaða velferðar. „Fyrst þarf að skapa verðmætin. Fyrst þarf að baka kökuna áður en við getum farið að deila henni út,“ segir hann.
Hann bendir á að höfnin í sveitarfélaginu hafi vaxið úr 150 milljóna króna rekstri á ári í 700 milljónir. Þá séu þrjú stór verkefni í undirbúningi, þar á meðal vatnsverksmiðjur, gagnaver og gróðurhús.
„Á þeim forsendum höfum við getað sótt velferðina,“ segir hann og leggur áherslu á að tekjur af uppbyggingu og atvinnustarfsemi séu forsenda góðrar þjónustu við íbúa.
Elliði segir einnig að sveitarfélagið hafi markað sér þá stefnu að hafa lóðir aðgengilegar. Hann telur ekki eðlilegt að lóðir séu meðhöndlaðar sem takmörkuð auðæfi.
„Ef einhver vill byggja hús, þá fær hann lóð og hann á ekkert að borga fyrir hana nema það sem kostar að búa til lóðina,“ segir hann. Hann telur sanngjarnt að greitt sé fyrir götur, lýsingu og skipulag, en hafnar því að lóðasölukostnaður og innviðagjöld séu notuð sem tekjulind.
„Það er skattur á heimilin. Við tökum engan þátt í þessu,“ segir Elliði að lokum.
Hægt er að sjá brot úr viðtalinu hér fyrir neðan en ef þú vilt sjá allan þáttinn geturðu tryggt þér áskrift að Brotkast.is hérna.