Starfsmaður barnaskóla Hjallstefnunnar hefur verið greindur með kórónuveiruna. Allt starfsfólk skólans er nú komið í sóttkví.
„Já því miður þá get ég staðfest þetta að kennari hjá okkur greindist með kórónuveiruna. Miðað við að ekki var búið að taka upp aftur reglurnar varðandi hólfaskiptinguna og það er eins metra regla milli starfsfólks í skólum þá var ekki stætt á öðru en að það fari allir í sóttkví,“ segir Þórdís Jóna Sigurðardóttir, framkvæmdastjóri Hjallastefnunnar, í samtali við mbl.is
Skólasetning var í gær, föstudaginn 21. ágúst og kennarinn sem greindist var ekki viðstaddur hana. Því þykir ekki ástæða til að senda nemendur eða foreldra í sóttkví. Reiknað er með að hægt verði að hefja starfsemi skólans að nýju 7. september.