Pétur Halldórsson var valinn Framúrskarandi ungur Íslendingur árið 2019 fyrir framlag sitt á sviði siðferðis og umhverfismála.
Pétur Halldórsson er formaður Ungra umhverfissinna og er ötull talsmaður náttúruverndar og valdeflingar ungs fólks. Hann hefur unnið hörðum höndum að uppbyggingu Ungra umhverfissinna en félagið hefur m.a. staðið fyrir loftslagsverkfallinu á Íslandi, í samvinnu við Landssamband íslenskra stúdenta, Samband íslenskra framhaldsskólanema og fleiri. Pétur hefur unnið að frumkvöðlastarfi innan félagsins og má þar helst nefna frumkvæði að námskeiðum í hagsmunagæslu fyrir sjálfbæra þróun og stofnun nýrra alþjóðlegra félagasamtaka: hins alþjóðlega tengslanets ungmenna um Norðurslóðir (Arctic Youth Network – AYN). AYN snýst um að valdefla og tengja saman ungt fólk um allan heim með áherslu á hvernig loftslagsmál, náttúruvernd og menningarlegt jafnrétti tengjast innbyrðis. Pétur er einnig í stjórn Landverndar og er mikill talsmaður þess að samrýma loftslagsaðgerðir og endurheimt vistkerfa.
Um árleg verðlaun er að ræða en Ingileif Friðriksdóttir hlaut verðlaunin í fyrra fyrir framlag til barna, heimsfriðar og/eða mannréttinda.
„Pétur er vel að þessum verðlaunum kominn. Hann hefur verið í sjálfboðavinnu í starfi sínu hjá Ungum Umhverfissinnum og nýtt frítíma sinn í baráttu sinni um náttúruvernd og loftslagsmál. Einnig stofnaði hann Arctic youth network, alþjóðlegt tengslanet ungs fólks sem er umhugað um umhverfismál. Ótrúleg afrek hjá þessum unga manni og við hlökkum til að fylgjast með næstu skrefum hjá honum. Framtíðin er björt með alla þessa ungu frambærilegu einstaklinga sem láta sig málefnin varða,“ segir Jón Rúnar Jónsson, verkefnastjóri Framúrskarandi 2019.
Tíu framúrskarandi einstaklingar voru verðlaunaðir fyrir framlag sitt til íslensks samfélags. Guðni Th. Jóhannesson, forseti Íslands, afhenti verðlaunin ásamt Söru Mansour, aktívista og baráttukonu og Rakeli Garðarsdóttur hjá Vakandi..
Dómnefndin í ár var skipuð: Áslaugu Örnu þingkonu, Einari K. Eyþórssyni umdæmisstjóra Kiwanis, Fanney Þórissdóttur landsforseti JCI, Jón Atli Benediktsson rektor Háskóla Íslands og Rakel Garðarsdóttir hjá Vakandi og fyrrum sigurvegari.