Allar stöðvar slökkviliðsins á höfuðborgarsvæðinu voru kallaðar út vegna elds sem logaði í íbúð í Mávahlíð, í nótt. Strax var ljóst að fólk væri inni í íbúðinni og voru reykkafarar sendir inn. Náðu þeir að bjarga tveimur út um glugga íbúðarinnar en sá þriðji komst út af sjálfsdáðum.
„Við byrjuðum á því að bjarga fólki út og svo var ráðist á eldinn eftir það sem gekk mjög hratt fyrir sig,“ sagði Gunnlaugur Jónsson, aðstoðarvarðstjóri hjá slökkviliðinu á höfuðborgarsvæðinu, í samtali við Mbl.
Allar íbúðir hússins voru rýmdar og var áfallateymi Rauða krossins kallað út. Allir íbúarnir fengu að fara aftur í íbúðir sínar er slökkvistarfi lauk en engar skemmdir urðu í öðrum íbúðum, fyrir utan reykjarlykt, að sögn Gunnlaugs. Íbúðin sem eldurinn kom upp í er hinsvegar mikið skemmd. „Hún er mikið skemmd vegna elds, reyks og vatns,“ segir Gunnlaugur.
Búið var að slökkva eldinn um klukkan þrjú í nótt og reykræstingu lauk á fjórða tímanum. Eldsupptök eru ókunn og er rannsókn í höndum tæknideildar lögreglunnar á höfuðborgarsvæðinu.