Tónlistarkonan una schram gefur út lagið, “Bum Boy”, föstudaginn 1. nóvember. Er þetta annað lagið sem hún gefur út hjá Les Fréres Stefson útgáfunni en lagið er samið af henni, danska rapparanum Orla Engstrøm og dönsku trap-tónlistarmönnunum Rob Smyles og JenneJenne.
“Bum Boy” snertir á viðkvæmum málefnum innan tónlistarbransans sem Una hefur upplifað á eigin skinni. Textinn fjallar um vinnusiðferði milli söngkonu og upptökustjóra sem koma að samstarfinu með ólíkum hvötum. Það má segja að lagið sé einskonar hefndarsaga þar sem una lætur kynferðislega tilburði upptökustjórans (Bum Boy) ekki á sig fá í stað þess að lítillækka hana. Danski rapparinn Orla Engstrøm, er í hlutverki upptökustjórans í laginu.
Una schram vakti fyrst athygli eftir að hún gaf út smáskífu í samstarfi við Ra:tio fyrr á þessu ári. Una er ein af ungum og upprennandi tónlistarmönnum í samstarfsverkefni Iceland Airwaves og Landsbankans fyrir tónlistarhátíðina í ár en hún kemur fram á hátíðinni 6. og 9. nóvember næstkomandi.