Stjórn Donald Trump Bandaríkjaforseta hefur ákveðið að fella niður tímabundna vernd (TPS) fyrir ríkisborgara Sómalíu.
Ákvörðunin hefur áhrif á þúsundir Sómala sem nú dvelja í Bandaríkjunum og munu þeir þurfa að yfirgefa landið eigi síðar en 17. mars næstkomandi.
Samkvæmt upplýsingum frá innanríkisráðuneyti Bandaríkjanna byggir ákvörðunin á því mati að aðstæður í Sómalíu hafi batnað nægilega til að landið uppfylli ekki lengur skilyrði fyrir tímabundinni vernd.
„Tímabundið þýðir tímabundið“
Kristi Noem, innanríkisráðherra Bandaríkjanna, segir í yfirlýsingu að tímabundin vernd eigi ekki að vera varanleg lausn.
Hún segir að núverandi aðstæður í Sómalíu réttlæti ekki áframhaldandi vernd og bætir við að hagsmunir Bandaríkjanna krefjist þess að ákvörðunin verði tekin.
Yfirvöld leggja áherslu á að stefna stjórnarinnar sé að setja bandaríska ríkisborgara í forgang, meðal annars með hertu innflytjendaeftirliti.
Afnámið kemur á sama tíma og alríkisyfirvöld halda áfram umfangsmiklum aðgerðum innflytjendaeftirlits í Minneapolis og nágrenni.
Tengist umfangsmiklum svikum í Minnesota
Aðgerðirnar í Minnesota eiga sér stað í kjölfar rannsókna á meintu svikamáli sem talið er nema allt að níu milljörðum dala.
Samkvæmt alríkisyfirvöldum tengist hluti málsins einstaklingum innan sómalska samfélagsins í ríkinu, meðal annars í gegnum fyrirtæki sem grunuð eru um að hafa verið notuð sem skálkaskjól fyrir svik.