Bandarísk stjórnvöld hafa afturkallað vegabréfsáritanir hinnar bresku pönkhljómsveitar Bob Vylan í kjölfar umdeildrar sviðsframkomu á Glastonbury tónlistarhátíðinni síðastliðinn laugardag.
Hljómsveitin vakti mikla athygli þegar hún leiddi áhorfendur í að kyrja meðal annars setningar á borð við „dauði yfir IDF“ (ísraelska hernum) og „frelsi fyrir Palestínu“.
Yfirvöld rannsaka málið
Lögreglan í Avon og Somerset hefur staðfest að myndbandsupptökur frá viðburðinum séu nú til skoðunar til að meta hvort um refsiverða háttsemi hafi verið að ræða.
Þá sagði bandaríski aðstoðarutanríkisráðherrann í yfirlýsingu: „Við munum ekki hleypa neinum inn sem styður hryðjuverkamenn. Hatursfull ummæli Bob Vylan á Glastonbury útilokar þá frá Bandaríkjunum.“
Hljómsveitin aflýsir tónleikaferð og sparkað af umboðsskrifstofu
Bob Vylan hafði áætlað að hefja tónleikaferð í Bandaríkjunum í október með tónlistarmanninum Grandson og spila í borgum á borð við New York, Chicago, Los Angeles og Seattle.
Nú hefur túrnum verið aflýst og tónlistarskrifstofan UTA sagt skilið við sveitina.
Nafn þeirra hefur jafnframt verið fjarlægt af vefsíðu skrifstofunnar.
Gagnrýnd af stjórnmálamönnum og fjölmiðlum
Menningarmálaráðherra Bretlands, Lisa Nandy, fordæmdi atvikið á breska þinginu á mánudag og sagði: „Þessi ríkisstjórn mun aldrei umbera gyðingahatur. Það er mikilvægt að greina á milli pólitískrar gagnrýni og hatursorðræðu.“
BBC hefur lýst yfir að orðræða sveitarinnar hafi verið „mjög móðgandi“ og ekki verði hægt að nálgast flutninginn á streymisveitum stöðvarinnar frá hátíðinni.
Tónlistarmennirnir bregðast við
Í kjölfar gagnrýninnar birti Bobby Vylan yfirlýsingu þar sem hann staðfesti afstöðu sína og sagði: „Ég sagði það sem ég sagði.“
Hann hvatti jafnframt til virkrar þátttöku yngri kynslóða í baráttu fyrir réttlæti, hvort sem það snýr að skólafæði eða utanríkisstefnu.
Þrátt fyrir að þurfa að aflýsa tónleikaferðinni um Bandaríkin er Bob Vylan enn á dagskrá á hátíðum í Evrópu.