Breskur karlmaður, sem sakaður er um að hafa reynt að opna neyðarhurð farþegaflugvélar Ryanair í miðju flugi, gæti átt yfir höfði sér allt að fimm ára fangelsisdóm í Frakklandi.
Atvikið átti sér stað föstudagskvöldið 26. september þegar vélin var á leið frá Luton flugvelli til Alicante á Spáni.
Maðurinn, sem var á ferð með syni sínum og hópi vina í steggjapartýi, var sagður „leiðtogi hópsins“ sem voru með læti og leiðindum um borð.
Samkvæmt frönskum yfirvöldum og sjónarvottum voru þeir ölvaðir, óhlýðnir og með ósæmilega hegðun gagnvart bæði flugliðum og farþegum.
Neyðarfluglending í Toulouse
Vegna hættulegrar hegðunar mannsins ákvað flugstjórinn að lenda vélinni tafarlaust í Toulouse í Frakklandi.
Þar beið sérsveit frönsku fluglögreglunnar (CGTA) sem fór um borð og fjarlægði manninn með valdi ásamt fleiri félögum úr hópnum.
Í myndskeiðum sem birt hafa verið á TikTok má sjá lögreglumenn draga mennina úr sætum sínum, handjárna þá og fylgja þeim út meðan fagnaðarlátum annarra farþega heyrast hátt og skýrt.
„Hann var mjög drukkinn og alkóhólmagn hans það hátt að það tók nokkrar klukkustundir áður en hægt var að yfirheyra hann,“ sagði heimildarmaður innan rannsóknarlögreglunnar í Toulouse.
Maðurinn situr nú í varðhaldi og hefur verið hafin formleg rannsókn sem gæti leitt til ákæru fyrir að stofna flugi í hættu, brot sem getur varðað allt að fimm ára fangelsi og 60.000 punda sekt í Frakklandi.
Ofsafengin hegðun hópsins fyrir flugtak
Farþegi að nafni Tania Nichols sagði í samtali við Daily Mail að hópurinn hafi verið hávær og með leiðindi áður en vélin fór á loft.
„Þeir voru að færa sig á milli sæta, hlustuðu ekki á öryggisleiðbeiningar og neituðu að sitja kyrrir. Einn þeirra reyndi að kyssa vinkonu mína og var fljótlega fjarlægður af áhöfninni,“ sagði hún.
Þegar flugvélin fór á loft tóku mennirnir að drekka eigið áfengi, skiptust á grófum bröndurum og voru að slást sín á milli.
Tveir urðu svo illilega reiðir að þeir rifu fötin hvor af öðrum og þurfti að stilla til friðar.
„Það var reynt að segja þeim að börn væru um borð, en þeir hlustuðu ekki. Einn farþegi fékk spark í höfuðið þegar annar lagði fætur sína á höfuðstoðina fyrir aftan,“ bætti Nichols við.
„Pabbi minn gerði ekkert!“
Á dramatísku myndskeiði má sjá son hins handtekna mótmæla kröftuglega: „Pabbi minn gerði ekkert, þeir byrjuðu!“
Hann var síðan einnig fjarlægður með valdi, þrátt fyrir að hafa mótmælt harðlega og kallað eftir hjálp.
Ryanair staðfesti í yfirlýsingu að vélin hefði þurft að lenda í Toulouse vegna hegðunar hópsins.
„Við höfum ekkert umburðarlyndi fyrir ósæmilegri hegðun farþega og munum halda áfram að beita eins hörðum aðgerðum og þarf til að tryggja öryggi annarra um borð,“ sagði talsmaður flugfélagsins.
Nú bíður hópurinn niðurstöðu rannsóknaryfirvalda í Frakklandi, og gætu þeir þurft að sæta bæði fangelsisrefsingu og háum fjársektum verði þeir sakfelldir.