Talsverð spenna virðist nú ríkja innan Framsóknarflokksins í kjölfar formannsskiptanna um helgina, ef marka má heimildir innan flokksins. Breytingarnar á forystu virðast þegar hafa haft áhrif á innra starf flokksins og samskipti hans.
Helgi Héðinsson hefur látið af störfum sem framkvæmdastjóri flokksins eftir þriggja ára starf. Hann segist í tilkynningu á facebook síðu sinni hafa tekið ákvörðunina áður en Lilja Alfreðsdóttir var kjörin formaður flokksins á sunnudag.
Nútíminn hafði áður fengið þær upplýsingar að þeir Helgi Héðins og Einar Gunnar, framkvæmdastjóri þingflokks Framsóknar hafi hvorugur sinnt störfum á skrifstofu flokksins eftir flokksþingið, en Helgi Héðinsson sagði þetta ekki alls kostar rétt þegar Nútíminn heyrði í honum rétt í þessu. Segist hann hafi tilkynnt Lilju þetta fyrir kosningarnar um helgina og að þetta hafi allt verið gert í mestu vinsemd og virðingu.
Flokksþingið skildi eftir skýrar fylkingar
Formannskjörið sjálft var, samkvæmt heimildum, átakasamt og mynduðust skýrar fylkingar innan flokksins.
Þrátt fyrir sigur Lilju Daggar Alfreðsdóttur lá, að sögn heimildarmanna, fyrir í aðdraganda kosningarinnar að Sigurður Ingi hefði ekki stutt framboð hennar. Engar opinberar yfirlýsingar hafa þó staðfest það.
Úrslitin virðast engu að síður hafa skilið eftir pólitíska spennu sem nú endurspeglast í daglegu starfi flokksins.
Þingflokkurinn sagður klofinn
Staða nýs formanns flækist enn frekar af því að hún situr ekki á Alþingi og þarf því að leiða þingflokk utan frá.
Samkvæmt heimildum studdi hluti þingflokksins mótframbjóðanda hennar, Ingibjörgu Ísaksen, í formannskjörinu – tveir af fimm þingmönnum.
Það þýðir að formaður flokksins stendur nú frammi fyrir því að byggja upp pólitískt traust og samstarf við þingflokk sem að hluta studdi annan leiðtoga í aðdraganda kjörsins.
Viðkvæmt valdajafnvægi
Heimildir innan Framsóknar segja stöðuna óvenju viðkvæma í upphafi nýs formannstímabils.
Bent er á að þegar formaður situr utan þings geti daglegt pólitískt samráð, stefnumótun og viðbragðsákvarðanir færst í auknum mæli til þingflokksins sjálfs.
Við slíkar aðstæður sé ekki sjálfgefið að öll pólitísk forysta og valdamiðja flokksins flytjist sjálfkrafa til nýs formanns – að minnsta kosti ekki til skemmri tíma.
Verkefnið fram undan
Næstu vikur og mánuðir munu ráða miklu um hvort takist að sameina fylkingar innan flokksins eftir formannsslaginn.
Í því samhengi mun einkum skipta máli:
-
Hvernig tekst að manna lykilstöður í framkvæmdakerfi flokksins
-
Hvernig samstarf við þingflokk þróast
-
Hvort nýr formaður nær að festa sig í sessi sem sameiningartákn
Úrlausn þessara þátta mun, að mati heimilda, hafa afgerandi áhrif á stöðu Framsóknarflokksins á komandi misserum.