Eldfjallið Etna á Sikiley á Ítalíu gaus með látum á mánudag og sendi frá sér glóandi ösku og hraun í svonefndu eldskýi, að því er fram kemur í tilkynningu frá jarðvísindastofnun Ítalíu (INGV).
Hraunið streymdi niður hlíðar fjallsins og sáust þess merki á innrauðum myndum sem stofnunin birti.
Í myndbandi sem birt var á Facebooksíðu INGV má sjá risavaxið öskuský rísa hátt upp í heiðbláan himin yfir fjallinu.
Talsmenn INGV greindu frá því að eldsumbrotin hófust í kjölfar þess að hluti suðaustur gígsins féll saman og leysti þannig úr læðingi hraunflæði.
Aðeins svæðið við topp fjallsins, sem lokað var fyrir ferðamönnum á mánudag, var talið í hættu.
Í einu myndbandi á samfélagsmiðlum mátti sjá ferðamenn hlaupa niður gönguleið við fjallið með reyk og ösku í bakgrunni, en engar fréttir eru um slys á fólki.
Samkvæmt fréttum AP segir Stefano Branca hjá INGV að engin hætta steðji að íbúum í nágrenninu.
Etna er virkasta eldkeila Evrópu og hefur gosið árlega undanfarin ár, oft með miklum öskufalli í nálægum bæjum, þó án þess að valda meiriháttar tjóni.
Í fyrra vakti Etna athygli fyrir að senda frá sér hringlaga öskuský í óvenjulegu sjónarspili.