Netglæpadeild Frakklands réðist í gærmorgun inn í skrifstofur samfélagsmiðilsins X í París. Rannsóknin er sögð tengjast grun um alvarleg brot, þar á meðal ólöglega öflun gagna og aðild að vörslu og dreifingu barnaníðsefnis.
Að sögn saksóknara hafa bæði Elon Musk, eigandi X, og fyrrverandi forstjóri fyrirtækisins, Linda Yaccarino, verið boðuð til yfirheyrslu í apríl.
Í færslu á X sagði Musk að aðgerðin væri pólitísk atlaga að sér og fyrirtækinu. Fyrirtækið hefur áður haldið því fram að franska rannsóknin beinist að tjáningarfrelsi og sé pólitísk valdbeiting.
Rannsókn franskra yfirvalda hófst í janúar 2025 og snerist þá um hvernig gervigreind X mælti með efni. Í júlí sama ár var svo einnig byrjað að rannsaka Grok, gervigreind X sem er þróað af fyrirtæki sem tengist Musk.
Eftir húsleitina segjast frönsk yfirvöld nú kanna hvort X hafi brotið lög á fleiri sviðum. Þar á meðal er grunur um aðild að skipulagðri dreifingu barnakláms, brot á persónurétti fólks með kynferðislegum gervigreindarmyndum og ólöglega gagnasöfnun.
Bretar hefja nýja rannsókn
Á sama tíma hafa bresk yfirvöld greint frá nýjum aðgerðum vegna Grok. Breska stofnunin ICO, sem sér um persónuvernd í landinu, hefur hafið rannsókn á því hvort persónuupplýsingar hafi verið notaðar með ólögmætum hætti við gerð kynferðislegra mynda og myndbanda með gervigreind.
Tilefnið eru sagðar vera gervigreindarmyndir sem voru búnar til með því að nota raunverulegar myndir af konum án samþykkis þeirra og svo dreift á X. Málið vakti mikla reiði í janúar meðal þolenda, baráttufólks fyrir netöryggi og stjórnmálamanna.
Fjarskiptastofnunin Ofcom hefur áður sagt að hún rannsaki dreifingu efnisins, en benti jafnframt á að hún hefði ekki nægar heimildir til að rannsaka sjálfa gerð myndanna. ICO telur hins vegar að málið falli undir persónuverndarlög.
Evrópusambandið fylgist með
Í lok janúar tilkynnti framkvæmdastjórn Evrópusambandsins að hún hefði hafið eigin rannsókn á móðurfélagi Grok og tilefnið sagt vera áhyggjura af gervigreindarmyndum. Talsmaður framkvæmdastjórnarinnar sagði tengingu við rannsókn franskra yfirvalda vegna húsleitarinnar í París.
Harðorð gagnrýni á frönsk yfirvöld
Pavel Durov, stofnandi skilaboðaforritsins Telegram, gagnrýndi frönsk stjórnvöld harðlega í færslu á X. Hann sagði Frakkland vera eina landið sem sækti öll samskiptaforrit til saka sem veittu fólki nokkurt frelsi frá ritskoðun yfirvalda.
Hann bætti við að Frakkland væri ekki frjálst land. Durov var sjálfur handtekinn í Frakklandi í ágúst 2024 vegna ásakana um að Telegram hefði ekki brugðist nægilega við glæpastarfsemi á forritinu. Honum var síðar leyft að yfirgefa landið eftir að breytingar voru gerðar á starfsemi þjónustunnar.