Einstaklingur hvetur þá sem ætla að kjósa já í komandi þjóðaratkvæðagreiðslu til að nýta sér akstursþjónustu Áfram Íslands, fá far á kjörstað og kjósa síðan þvert á afstöðu samtakanna.
Hvatningin birtist í opna Facebook hópnum „Já við ESB-viðræðum“. Þar skrifaði Grétar Mar Baldvinsson:
„Hvet alla JÁ-ara til að nýta sér þetta og láta Áfram Ísland skutla ykkur á kjörstað, svo að sjálfsögðu kjósum við JÁ á þeirra kostnað.“
Áfram Ísland hefur auglýst að þeir sem þurfa far á kjörstað geti skráð sig í akstursþjónustu samtakanna.
Fékk litlar undirtektir
Báðar hliðar baráttunnar hafa hvatt til skemmtilegra og drengilegrar umræðu og þetta mun líklega seint teljast til slíks. Hugmyndin virðist þó ekki hafa fallið í sérstaklega frjóan jarðveg. Þegar færslan hafði staðið inni í hópnum í um klukkustund hafði hún ekki fengið miklar undirtektir.
Ekkert bendir því til þess á þessum tímapunkti að margir hyggist nota þessa aðferð.
