Breski rithöfundurinn og blaðamaðurinn Julie Bindel var gestur í Spjallinu með Frosta Logasyni. Bindel segir Ísland vera það land þar sem áhrif svokallaðrar transhugmyndafræði séu hvað mest á Vesturlöndum.
Bindel er reglulegur pistlahöfundur hjá The Telegraph og hefur í áratugi verið þekkt fyrir baráttu sína gegn kynbundnu ofbeldi og vændi. Hún hefur áður komið til Íslands og starfað með Stígamótum þegar samtökin börðust gegn rekstri nektardansstaða í Reykjavík.
Segir Stígamót hafa hafnað fundi
Í viðtalinu segir Bindel að hún hafi haft samband við Stígamót og önnur kvennasamtök í tengslum við rannsóknargrein sem hún vinnur að fyrir Telegraph um stöðu kvenréttinda og áhrif kynjafræði á femíníska baráttu. Hún segist ekki hafa fengið svör við fyrstu erindum sínum og að lokum hafi henni verið tjáð að samtökin væru „stolt af inngildingarstefnu sinni“.
Bindel túlkar það svo að samtökin vilji ekki funda með henni vegna afstöðu hennar í málefnum trans fólks. Hún hefur á undanförnum árum gagnrýnt harðlega þróun í lagasetningu og stefnumótun sem hún telur grafa undan réttindum kvenna, meðal annars í fangelsismálum, í athvörfum fyrir þolendur ofbeldis og á sjúkrahúsum.
Hún segir að samtök sem áður hafi starfað á grundvelli róttæks femínisma hafi nú breyst algjörlega og að hún hafi verið sniðgengin þegar hún óskaði eftir samtali.
„Þið fáið verðlaunin“
Bindel er stödd hér á landi til að vinna rannsókn um stöðu mála á Íslandi. Hún segir landið hafa gengið lengra en önnur ríki sem hún hafi heimsótt, þar á meðal Nýja Sjáland, Ástralíu og Kanada.
„Þið fáið verðlaunin. Þið eruð verst af þeim sem ég hef séð,“ segir hún í þættinum og bætir við að ótti og þöggun einkenni umræðuna.
Segir fólk óttast afleiðingar þess að tjá sig
Hún líkir stöðunni við McCarthy tímabilið í Bandaríkjunum og segir fólk óttast félagslega útskúfun ef það tjáir sig. Bindel segist hafa rætt við foreldra, fræðimenn og samkynhneigðar konur sem telji sig hafa orðið fyrir neikvæðum félagslegum afleiðingum vegna skoðana sinna. Hún nefnir meðal annars mál feðra sem berjist í dómskerfinu vegna ágreinings um kynvitund barna, auk þess sem hún hafi skoðað aðstæður í sundlaugum og öðrum opinberum rýmum þar sem kynskráning og kynvitund hafi áhrif.
Hún segir að hún muni kynna niðurstöður sínar betur í væntanlegri grein í Telegraph.
Hægt er að sjá brot úr viðtalinu hér fyrir neðan en ef þú vilt sjá allan þáttinn geturðu tryggt þér áskrift að Brotkast.is hérna.