Julian Assange hefur kært Nóbelsstofnunina vegna friðarverðlauna 2025 sem veitt voru Maríu Corrinu Machado og segir verðlaunaféð breyta friðartæki í stuðning við stríð.
Hann sakar Machado um að hvetja til hernaðaraðgerða gegn Venesúela, telur verðlaunaveitinguna brjóta gegn erfðaskrá Alfreds Nóbels og krefst þess að greiðsla verðlaunafjárins verði stöðvuð á meðan málið er rannsakað.
Kristinn Hrafnsson, fyrrverandi ritstjóri Wikileaks, segist styðja fyllilega kæru Julians Assange til sænskra yfirvalda þar sem krafist er að greiðslur upp á 11 milljónir sænskra króna, sem eru um 150 milljónum íslenskra króna, til nýs friðarverðlaunahafa Nóbels, Maríu Corrinu Machado, verði frystar á meðan meint lögbrot tengd verðlaunaafhendingunni eru rannsökuð.
Kristinn greinir frá afstöðu sinni í færslu á Facebook.
Í færslunni bendir Kristinn á að þótt norska Nóbelsnefndin taki ákvörðun um hver hlýtur friðarverðlaunin, þá beri Svíar ábyrgð á umsýslu fjármuna sem tengjast arfi Alfreds Nóbels.
Að hans mati stangist greiðsla verðlaunafjárins til Machado á við markmið friðarverðlaunanna, eins og þau séu skilgreind í erfðaskrá Nóbels.
Hann segir að veiting verðlaunanna sé „gróflega á skjön við tilgang friðarverðlaunanna“.
Varar við mögulegum lagabrotum
Kristinn heldur áfram og segir að einnig verði að skoða hvort brotin hafi verið lög sem banna fjárstuðning við óhæfuverk eða stríðsglæpi.
Hann fullyrðir að Machado hafi lýst yfir stuðningi við yfirvofandi loftárásir eða jafnvel innrás Bandaríkjanna í Venesúela undir stjórn Donalds Trump.
Að hans sögn hafi hún þegar „klappað upp mannskæðar árásir á fiskibáta undan ströndum Venesúela“.
Gagnrýnir Nóbelsnefndina harðlega
Kristinn tekur skýrt fram að honum þyki „óbærilega vitskert“ að veita Machado friðarverðlaun Nóbels.
Hann telur að með ákvörðun sinni hafi norska Nóbelsnefndin hraðað atburðarás og búið til réttlætingu fyrir mögulegar hernaðaraðgerðir Bandaríkjanna gegn Venesúela.
Hann vísar jafnframt til nýlegra yfirlýsinga Bandaríkjaforseta og segir að miðað við orðalag hans gæti verið stutt í allsherjarárás á landið.
Bendir á olíuhagsmuni
Í færslunni nefnir Kristinn að Venesúela búi yfir stærstu olíubirgðum heims og veltir upp hvort raunverulegar ástæður aðgerðanna sé að finna þar.
Hann líkir ástandinu við innrásina í Írak árið 2003 og segir að gagnrýnendur hennar hafi þá verið spurðir hvort þeir styddu Saddam Hussein.
Kristinn segir að hann vonist til þess að fólk falli ekki aftur í þá gryfju að blanda saman gagnrýni á hernað og stuðningi við tiltekna leiðtoga og biður sérstaklega um að Nicolás Maduro verði ekki dreginn inn í umræðuna á þeim forsendum.