Fyrrverandi bæjarstjóri í Bretlandi hefur verið dæmd sek fyrir að hafa hindrað rannsókn lögreglu eftir að sonur hennar var sakaður um að hafa nauðgað 15 ára stúlku.
Naheed Ejaz, 61 árs, sem gegndi embætti bæjarstjóra í Bracknell í Berkshire, var sakfelld fyrir að hafa hindrað framgang réttvísinnar. Sonur hennar, Diwan Khan, 41 árs, var svo sakfelldur fyrir nauðgun.
Málinu lauk með sakfellingu beggja.
Sími með lykilgögnum aldrei endurheimtur
Samkvæmt saksóknara gaf Khan stúlkunni MDMA með því að blanda efninu í vodka. Hún missti meðvitund og vaknaði síðar nakin í aftursæti bifreiðar hans og mundi ekkert hvað hafði gerst.
Khan tók upp myndband af nauðguninni. Hann sýndi henni upptökuna og sendi henni hana síðar, samhliða hótunum um að hann myndi sýna móður hennar myndbandið ef hún segði frá. Í skilaboðum hótaði hann jafnframt að skera hana á háls ef hún segði frá.
Síminn sem talið er að hafi innihaldið myndbandið fannst aldrei.
Lögregla mætti á heimili til að handtaka Khan og að sögn ákæruvaldsins neitaði Ejaz að hleypa lögreglu inn í um eina og hálfa mínútu. Á þeim tíma ræddu mæðginin saman á sínu tungumáli um hvað ætti að gera við símann.
Á upptökum úr búkmyndavél lögreglu heyrist Khan nefna „stóru bjölluna“, sem saksóknari sagði hafa verið dulnefni yfir símann. Ejaz svarar: „þegiðu, ég veit.“
Saksóknari hélt því fram að hún hafi annað hvort falið símann á sér eða komið honum fyrir í svefnherbergi sínu. Við húsleit fundust 26 SIM kort á heimilinu og Ejaz var með 12 mismunandi tengiliði skráða fyrir son sinn.
Svokallaðri foreldravörn hafnað
Verjandi Ejaz hélt því fram að hún hafi verið að reyna að fá son sinn til að tala við lögreglu og að hún hafi í raun verið að leita að símanum til að afhenda hann. Dómurinn féll þó gegn henni.
Verjandi Khan hélt því fram að stúlkan hefði logið til um aldur sinn og sagst vera 22 ára, en kviðdómur féllst ekki á þau rök.
Refsing þeirra verður ákveðin á næstu vikum.