Leiguverð á íbúðum vestanhafs heldur áfram að lækka í kjölfar metframboðs á nýjum fjölbýlisíbúðum.
Samkvæmt gögnum Apartment List féll landsmeðaltal íbúðaleigu um eitt prósent í nóvember og stendur nú í 1.367 dollarum á mánuði.
Þetta er fjórði mánuðurinn í röð þar sem leigan lækkar og er hún nú 5,2 prósentum undir hámarkinu sem náðist árið 2022.
Metframboð
Laus íbúðapláss í fjölbýlishúsum náðu sögulegu hámarki í október og stóðu áfram í 7,2 prósentum í nóvember.
Þrátt fyrir að uppbygging fjölbýlishúsa sé nú farin að dragast saman er enn mikið af nýjum íbúðum að koma inn á markað á sama tíma og eftirspurn veikist.
Samkvæmt CoStar hefur lækkun leiguverðs í haust verið sú mesta í fimmtán ár.
Helsta skýringin er sögð vera breytt hegðun ungs fólks, sem sífellt frekar býr heima hjá fjölskyldu vegna hárrar leigu og erfiðari aðstæðna á vinnumarkaði.
Segir að aðgerðir gegn ólöglegum innflytjendum hafi haft áhrif á leiguverð
Í umfjöllun Times of India er haft eftir varaforsetanum JD Vance að lækkandi leiguverð megi að hluta rekja til harðari aðgerða stjórnvalda gegn ólöglegum innflytjendum.
Vance segir að samdráttur í komu fólks á undanförnum mánuðum hafi dregið úr þrýstingi á húsnæðismarkaðinn og þannig átt þátt í að lækka leigu á landsvísu.
Hann heldur því fram að fyrri aukning í leiguverði hafi að stórum hluta verið knúin áfram af fjölgun fólks sem hafi ekki verið með löglegan rétt til búsetu og að markaðurinn sé nú að leiðrétta sig eftir aðgerðir stjórnvalda.