Ókunnugur maður gekk inn á heimili í íbúðarhverfi síðdegis fimmtudaginn 26. febrúar á meðan tvö börn voru ein heima. Foreldrar barnanna hafa sagt frá atvikinu í færslu á samfélagsmiðlum og vilja vekja athygli á málinu.
Samkvæmt frásögn þeirra gerðist atvikið rétt fyrir klukkan 17. Foreldrarnir og 14 ára sonur þeirra voru að fara út þegar þeir sáu mann ganga um hverfið, tveimur húsum frá heimili þeirra. Stuttu síðar fór maðurinn inn í húsið.
Börnin læstu sig inni í herbergi
Tveir synir þeirra, 8 og 11 ára, voru heima þegar maðurinn kom inn. Börnin spurðu manninn hvað hann væri að gera inni á heimilinu og fengu stutt svar á ensku, „waiting“.
Eftir það læstu þau sig inni í herbergi á meðan maðurinn var inni í húsinu.
Samkvæmt frásögninni var maðurinn inni í um tíu mínútur áður en tveir fullorðnir sem tengjast fjölskyldunni komu á staðinn og ráku hann út.
Sagðist vera að leita að gistiheimili
Þegar maðurinn var rekinn út sagðist hann vera að leita að gistiheimili í nágrenninu. Foreldrarnir segja þó að eftir samtal við eiganda gistiheimilis hafi komið í ljós að maðurinn var hvorki gestur þar né með bókun.
Maðurinn var sagður vera um fimmtugt, klæddur svartri úlpu með hettu, dökkgráum gallabuxum og svörtum skóm og með stór heyrnartól. Hann talaði bjagaða ensku og var einn á ferð.
Lögregla hefur fengið myndir
Fjölskyldan segist hafa bæði myndband af manninum fyrir utan húsið og ljósmynd af honum inni á heimilinu. Þær myndir hafa verið afhentar lögreglu en fjölskyldan segist ekki vilja birta þær opinberlega.
Lögreglu hefur verið tilkynnt um málið og er það nú til skoðunar.
Foreldrarnir segja jafnframt að um sé að ræða annan einstakling en þann sem áður var til umræðu í Ásahverfi fyrir um mánuði síðan.
Að lokum hvetja þau fólk til að gæta varúðar og hafa læst heima hjá sér á daginn, jafnvel þótt einhver sé heima.