Páll Vilhjálmsson, fyrrum framhaldsskólakennari og bloggari, sakar formann Blaðamannafélags Íslands, Sigríði Dögg Auðunsdóttur, um að hafa viljandi farið rangt með efni úr alþjóðlegri úttekt á stöðu fjölmiðla á Íslandi og með því dregið upp aðra mynd en fram kemur í frumtexta.
Í nýlegri færslu fer hann yfir afmarkað efni úr úttekt Blaðamanna án landamæra og segir að þar fari upprunalegur texti og endursögn Sigríðar ekki saman.
Segir „fulltrúa útgerða“ uppspuna
Páll bendir á að í upprunalegum texta er bent á eignarhald stórra útgerðarfyrirtækja á fjölmiðlum og mögulega hagsmunaárekstra, en hins vegar að Sigríður tali um að sjálfstæði blaðamanna sé ógnað af fulltrúum stórfyrirtækja, sérstaklega útgerðarfyrirtækja. Páll segir að í endursögn Sigríðar Daggar sé þessu snúið upp í að fulltrúar útgerða ógni sjálfstæði blaðamanna, sem hann telur ekki eiga sér stoð í upprunalega textanum.
„Sigríður Dögg býr til ,,fulltrúa“ útgerða þar sem enski textinn talar um eignarhald útgerða á fjölmiðlum,“ segir Páll.
Páll heldur því einnig fram að fullyrðingar um mútugreiðslur í Namibíu hafi aldrei verið staðfestar með gögnum. Hann segir að í úttektinni sé aðeins talað um grun um spillingu (suspected corruption), sem sé allt annað en staðfestar mútur.
Þá heldur hann því fram að það sem hann segir vera rangfærslur í umfjöllun Sigríðar þjóni þeim tilgangi að ýta undir þá frásögn að íslenskir fjölmiðlar hafi afhjúpað stórt spillingarmál erlendis.
Deilan snýst um hvað var rannsakað
Páll heldur því einnig fram í gagnrýni sinni að lögreglurannsókn gegn blaðamönnum sem vísað er til í úttektinni hafi ekki beinst að Namibíumálinu sjálfu, heldur að svokölluðu byrlunar- og símamáli hér á landi, þar sem sími skipstjóra var afritaður eftir að honum var byrlað og gögn sem í honum voru nýtt í fjölmiðlaumfjöllun.
Páll heldur því fram að þetta samhengi sé vísvitandi falið í endursögn formannsins:
„Sakamenn í röðum blaðamanna þegja enn um aðkomu sína að byrlunar- og símamálinu. Formaður fagfélags blaðamanna leggur sig fram um að gera byrlun, stuld og ólöglega afritun einkasíma á Íslandi að mútumáli í Afríku. Dálítið langsótt.“
Blaðamaður náði í Sigríði Dögg Auðunsdóttur í síma en hún kaus að tjá sig ekki um færslu Páls að svo stöddu.