Foreldrar við kaþólskan einkaskóla í Suður-Ástralíu eru brjálaðir eftir að transstelpa, 13 ára að aldri, sló fjölda íþróttameta á árlegum íþróttadegi skólans þar sem aðilinn keppti í kvennaflokki.
Málið hefur vakið mikla reiði, sérstaklega þar sem skólinn er trúarlegur og foreldrar sögðust ekki hafa átt von á slíku „í kaþólskum skóla“.
Fjölmargir foreldrar hafa kvartað við skólann í kjölfarið og lýst yfir vonbrigðum með að stelpur þeirra hafi ekki átt séns í keppnina.
„Við vorum á íþróttadeginum, og það var strax mikið talað um strák sem væri búinn að breyta sér í stelpu og væri að brjóta öll metin í stelpuflokknum,“ sagði einn faðir sem á tvö börn í skólanum.
Sló mörg gömul met – ekkert nefnt opinberlega
Samkvæmt heimildum voru met í spretthlaupi, hástökki, kringlukasti og spjótkasti öll slegin af sama transkeppandanum, sem setti meðal annars nýtt met í spjótkasti í flokki 13 ára stúlkna – 20,58 metrar, sem er rúmlega þremur metrum lengra en fyrra met.
Hins vegar sleppti skólinn að birta nöfn sigurvegaranna í ár, ólíkt því sem venjan hefur verið.
„Yfirleitt sendir skólinn frá sér lista yfir sigurvegara, en ekki núna, því þessi stelpa vann nánast allt,“ sagði faðirinn.
Hann sagðist ekki vilja að barnið verði fyrir einelti eða árásum, „en við getum ekki látið svona lagað bara gerast, að breyta öllu fyrir eina manneskju.“
Foreldrar gagnrýna skólann harðlega – og kerfið líka
Annar faðir sagði „allan íþróttadaginn hafa verið litaðan af þessu.“ Hann segist hafa rætt við starfsmann skólans en fengið það svar að enginn annar hefði kvartað.
Foreldrar hafa síðan sent kvartanir með tölvupósti til skólastjórnenda.
Í einu bréfi sagði faðirinn: „Drengur keppir sem stelpa og tekur sénsinn frá einhverri stelpu sem hefði getað blómstrað í frjálsum íþróttum.“
Hann gagnrýndi jafnframt að transneminn hefði aðgang að stúlknasalernum og sagði: „Þið eruð að biðja um málsókn.“
Stjórnendur og yfirvöld vísa til lögbundinnar skyldu
Skólinn hefur ekki tjáð sig opinberlega um málið en fulltrúi Kaþólsku kirkjunnar í Port Pirie sagði að „ekki væri hægt að tjá sig um einstök mál vegna persónuverndar.“
Samkvæmt reglum Menntamálaráðuneytis Suður-Ástralíu skulu öll börn fá að keppa í samræmi við kynvitund sína.
Lög eins og Sex Discrimination Act og Equal Opportunity Act banna mismunun á grundvelli kynvitundar, og það hefur forgang fram yfir kvartanir foreldra.
Stjórnmálamenn skipta sér af málinu – krefjast lagabreytinga
Sarah Game, þingkona One Nation, segir málið sýna nauðsyn á að „endurvekja líffræðilega raunveruleika í lögum.“
Hún vinnur að lagafrumvarpi sem bannar strákum að keppa í kvennaíþróttum í Suður-Ástralíu.
„Stúlkur eiga að keppa við stúlkur, ekki líffræðilega drengi,“ sagði hún.
Hún benti á nýlega dóma í Bretlandi þar sem kyn er skilgreint sem líffræðilegt kyn, og gagnrýndi að bæði Verkamannaflokkurinn og Frjálslyndir væru of hræddir til að „tala hreint út.“
Málið heldur áfram að vekja deilur í Ástralíu þar sem mörg foreldrasamtök, stjórnmálamenn og fjölmiðlar ræða nú hvort núverandi lög séu sanngjörn gagnvart stúlkum í íþróttum.