Ríkið gæti hafa tapað allt að 25 milljörðum króna við sölu á hlut sínum í Íslandsbanka í vor, ef miðað er við þróun á gengi bankans undanfarna mánuði. Þetta kom fram í umræðum í þætti Hluthafaspjalls ritstjóranna á Brotkast.is, þar sem þeir Jón G. Hauksson og Sigurður Már Jónsson ræddu um söluna á 45 prósenta hlut ríkisins og þá gagnrýni sem henni hefur fylgt.
Gengi bréfa í Íslandsbanka hefur rokið upp að undanförnu og stendur nú í 142, en ríkið seldi hlut sinn í bankanum í vor á genginu 107. Það jafngildir um 30 prósenta hækkun á skömmum tíma. Miðað við núverandi markaðsvirði bankans, sem nemur um 256 milljörðum króna, hefði 45 prósenta hlutur ríkisins nú verið metinn á um 115 milljarða króna.
Ríkissjóður fékk hins vegar um 90 milljarða króna fyrir hlut sinn í sölunni í vor, sem þýðir að ríkið gæti hafa farið á mis við allt að 25 milljarða króna miðað við núverandi verðmat markaðarins.
Allt vitlaust þegar Bjarni seldi á þó hærra gengi
Í þættinum var rifjað upp að mikill stormur skapaðist fyrir rúmum tveimur árum þegar Bjarni Benediktsson, þáverandi fjármálaráðherra, samþykkti sölu á hlut ríkisins í Íslandsbanka á genginu 118. Andstæðingar hans töluðu þá um „gjafagjörning“ til fárra útvaldra fjárfesta og sögðu ríkið vera að selja verðmæta eign langt undir raunvirði.
Spurt var í þættinum hvað þeir sömu pólitísku andstæðingar segðu nú, í ljósi þess að núverandi ríkisstjórn hafi í vor selt enn stærri hlut á lægra gengi, á sama tíma og markaðsvirði bankans hafi hækkað verulega í kjölfarið.
Í umræðunni kom einnig fram að viðræður standi nú yfir um mögulega sameiningu Íslandsbanka og Skaga, sem gæti haft veruleg áhrif á framtíðarvirði bankans og styrkt enn frekar þá spurningu hvort ríkið hafi farið of snemma út úr bankanum.
Umræðan í Hluthafaspjalli ritstjóranna, sem sjá má hér að neðan, varpar þannig skýru ljósi á þá ákvörðun ríkisstjórnarinnar að selja bankahlutinn í vor og vekur upp spurningar um hvort skattgreiðendur hafi fengið full verðmæti fyrir eign sína.