Snorri Másson, þingmaður Miðflokksins, gagnrýndi harðlega fyrirhugaða innleiðingu Evrópureglugerða um stafræna þjónustu á Alþingi í gær og segir að um sé að ræða atlögu að tjáningarfrelsi hér á landi.
„Frelsið á undir högg að sækja,“ sagði Snorri í ræðu sinni á Alþingi og vísaði þar til orða utanríkisráðherra Viðreisnar frá nýliðnum landsfundi flokksins.
Stjórnvöld boði nýja aðgerðaáætlun
Í færslu á samfélagsmiðlinum X segir Snorri að íslensk stjórnvöld hafi, í nýrri aðgerðaáætlun, boðað að meiri tjáning á netinu geti framvegis talist ólögleg efni.
Hann segir að þetta sé liður í innleiðingu stafrænnar löggjafar frá Evrópusambandinu, svonefnds Digital Services Act.
„Helsta réttlæting stjórnmálamanna á okkar tímum fyrir hvers konar aðförum að tjáningarfrelsi er að beita fyrir sig jaðarhópum ýmsum, sem eigi að verja fyrir svonefndri hatursorðræðu. Raunverulegt markmið þessara sömu stjórnmálamanna er þó í raun ævinlega að verja sjálfa sig, frá orðræðu sem þeir sjálfir hata,“ skrifar Snorri.
Gagnrýnir ritskoðun í nafni frjálslyndis
Í ræðu sinni sagði Snorri að ráðandi öfl í Evrópusambandinu, sem hann lýsir sem „valdsæknum frjálslyndum stjórnmálamönnum,“ séu í síauknum mæli farin að styðja takmarkanir á tjáningarfrelsi í nafni þess að vernda lýðræði og mannréttindi.
„Ef þú gagnrýnir útlendingastefnu stjórnvalda, ef þú gagnrýnir kynjahugmyndafræði hvers konar, ef þú gagnrýnir einfaldlega ráðandi öfl í einhverri mynd, þá átt þú á hættu að fá heimsókn frá lögreglu,“ sagði Snorri.
Dæmi um áhrif nýrrar löggjafar
Snorri sagði að hluti þessarar þróunar færi nú þegar fram undir formerkjum Digital Services Act, sem sé heildarlöggjöf Evrópusambandsins á stafræna sviðinu og veiti stjórnvöldum heimild til að stýra því „hvað fer fram á samfélagsmiðlum“.
Hann sagði jafnframt að dómsmálaráðherra, sem einnig kemur úr Viðreisn, hyggist nú innleiða þessa löggjöf hér á landi, og að hún gæti leitt til þess að meiri tjáning verði skilgreind sem ólöglegt efni.
„Það er til dæmis verið að sækja mann til saka hér á Íslandi fyrir að segja að karlar geti ekki fætt börn,“ sagði Snorri og bætti við að stjórnvöld hafi enn ekki skilgreint raunverulega hvað teljist hatursorðræða.
„Enginn lýsir áhyggjum af þessu í Viðreisn“
Snorri gagnrýndi sérstaklega að Viðreisn, sem segist standa vörð um mannréttindi og frelsi, hafi ekki lýst neinum áhyggjum af því sem hann kallar aðför að borgaralegum réttindum.
„Það er sama hvaða málaflokkur það er eða hvaða jaðarhópum valdsæknir frjálslyndir stjórnmálamenn beita fyrir sig í þessu efni. Þegar stjórnvöld ætla sér sífellt að auka vald sitt til þess að sækja borgarana til saka fyrir tjáningu með ógagnsæjum hætti, þá er þetta sannarlega staðan: frelsið á undir högg að sækja,“ sagði Snorri að lokum.
Íslensk stjórnvöld boða í nýrri aðgerðaáætlun að meiri tjáning á netinu geti framvegis talist ólöglegt efni. Innleiða á stafræn lög frá Evrópusambandinu í þessum tilgangi.
Helsta réttlæting stjórnmálamanna á okkar tímum fyrir hvers konar aðförum að tjáningarfrelsi er að beita… pic.twitter.com/d8IKz3RB7u
— Snorri Másson (@5norri) September 25, 2025