Snorri Másson, þingmaður Miðflokksins, gagnrýnir harðlega þá afstöðu umhverfis-, orku- og loftslagsráðherra, Jóhanns Páls Jóhannssonar, að standa gegn olíuleit innan íslenskrar lögsögu.
Snorri skrifaði ítarlega færslu á Facebook þar sem hann telur að pólitísk og hugmyndafræðileg sjónarmið ráði ferðinni í stað þess að alvöru leit fari fram.
Telur ríkið láta tækifæri fram hjá sér fara
„Það er ekki vegna þess að allir séu sammála um að engin olía sé til, heldur var leit hætt vegna annarra, meðal annars pólitískra þátta,“ skrifar Snorri.
Hann segir að tillaga Miðflokksins sé einfaldlega sú að hæfir einkaaðilar fái að leita af sér allan grun, án kostnaðar fyrir ríkissjóð, en með möguleikanum á tugþúsunda milljarða króna ávinningi ef olía fyndist.
Snorri sakar ráðherrann um að nota siðferðisleg rök sem skjól fyrir áhrif rétttrúnaðar innan síns eigin flokks.
Hann vísar jafnframt til viðtals við Dag B. Eggertsson, sem sagði að áhugi á olíuleit kæmi frá „miðaldra körlum“ sem vildu komast í „olíuflokka“ á þingi.
„Ég er enn að vinna úr þeim aldursfordómum,“ skrifar Snorri og bendir á að Dagur sé 25 árum eldri en hann sjálfur.
Ráðherra: Engin gögn sem styðja svona háar væntingar
Jóhann Páll svaraði gagnrýninni í óundirbúnum fyrirspurnartíma á Alþingi og sagði að ekkert lægi fyrir sem styddi slíkar háar tölur sem Snorri nefndi.
„Það væri ábyrgðarhluti af ríkinu að fara út í slíkar áhættufjárfestingar þegar einkaaðilar hafa tvisvar sinnum skilað inn leyfum vegna þess að ekki þótti forsvaranlegt að setja meiri fjármuni í þetta,“ sagði ráðherra.
Hann benti einnig á að það væri ekki ráðherra sem veitir leyfi til leitar, heldur Umhverfis- og orkustofnun samkvæmt lögum sem ríkisstjórnin hafi ekki í hyggju að breyta.
„Við skulum halda jarðtengingunni í umræðunni“
Jóhann Páll sagði að gögn sem aflað var á Drekasvæðinu hefðu legið óhreyfð inni í læstu herbergi á Orkustofnun um árabil og hann hafi falið stofnuninni að rýna þau rækilega.
Hann vænti þess að þeirri skoðun ljúki fyrir áramót.
„Við skulum byrja þar og taka þessa umræðu út frá gögnum og staðreyndum og vísindarannsóknum ekki út frá getgátum einhverra íslenskra aðila sem halda einhverju fram sem er algerlega á skjön við það sem stóru aðilarnir sögðu á sínum tíma,“ sagði ráðherra.
Olía áfram notuð á heimsvísu
Snorri gagnrýndi það að ekki fengist skýrt svar frá ráðherra um hvernig hann myndi bregðast við ef kæmi raunveruleg umsókn frá alþjóðlegu olíufyrirtæki í samstarfi við íslenska aðila.
„Við getum ráðið því sjálf hvort við viljum hagnast ævintýralega á þessari auðlind eða eftirláta þetta Bandaríkjunum, Rússum, Íran og Sádi-Arabíu,“ sagði Snorri.
Hann spurði hvort ákvörðun ráðherra væri tekin af loftslagssjónarmiðum einum saman, eða undir þrýstingi þeirra sem hafna verðmætasköpun af þessu tagi „af nánast trúarlegum ástæðum“.
Ráðherra endurtók í lok svars síns að mikilvægt væri að forðast „uppsprengdar væntingar“ og að umræðan yrði að byggjast á staðreyndum. Hann tók þó undir að græn orka væri „olía Íslands“ og það væru þar stóru tækifærin til framtíðar.