Það þarf meiri en smá kvef til að stoppa Jón Pétur Zimsen, þingmann Sjálfstæðisflokksins, en nú veit hann að það er ekki sama hvaða flösku maður grípur um miðja nótt.
Í færslu á X í morgun lýsir hann því hvernig hann vaknaði, aumur í hálsi eftir nokkra daga af hósta og kvefi.
Hann greip spreyglas úr baðskapnum, sendi tvö góð púst ofan í hálsinn, en áttaði sig strax á því að eitthvað var mjög, mjög rangt.
„Eitthvað var bragðið rammt og brennandi,“ skrifar hann. Við nánari skoðun blasti við honum mynd af hundi á spreyflöskunni, en í stað hálsspreys hafði hann gripið meðal sem ætlað var eyrum heimilishundsins.
„Varð ekki svefnsamt næstu tímana með eyrnasprey fyrir hunda úðað ofaní kokið á mér ,“ segir þingmaðurinn.
Nútíminn óskar þingmanninum að sjálfsögðu góðs bata.
