Tveir karlar og ein kona voru í gær úrskurðuð í tveggja vikna gæsluvarðhald í Héraðsdómur Reykjavíkur, eða til 2. janúar næstkomandi, að kröfu Lögreglan á höfuðborgarsvæðinu. Gæsluvarðhaldið er liður í rannsókn lögreglu á alvarlegum auðgunarbrotum.
Þremenningarnir eru erlendir ríkisborgarar á þrítugs- og fertugsaldri sem voru handteknir í fyrradag vegna ætlaðra brota í Reykjavík. Brotin beindust að öldruðu fólki og varða háar fjárhæðir, að sögn lögreglu.
Samkvæmt upplýsingum komu hinir grunuðu til Íslands í byrjun vikunnar og er talið að tilgangur ferðarinnar hafi verið að stunda brotastarfsemi hér á landi.
Þjófur sendur úr landi
Í sömu fréttatilkynningu kemur fram að öðrum erlendum ríkisborgara, karlmanni um fertugt, hafi verið vísað frá Íslandi í fyrradag. Maðurinn var handtekinn vegna þjófnaðarmála í miðborg Reykjavíkur. Í fórum hans fundust sérútbúnar töskur, fóðraðar með álpappír til að komast framhjá þjófavörnum verslana, auk þýfis.
Við yfirheyrslu játaði maðurinn sök. Hann hafði komið til Íslands síðastliðinn þriðjudag og er talið að ferðin hafi verið farin í þeim tilgangi að stunda skipulagða brotastarfsemi.
Frávísunin var framkvæmd á grundvelli d-liðar 1. mgr. 94. gr. laga um útlendinga nr. 80/2016 og var maðurinn sendur úr landi um leið og ákvörðunin lá fyrir.