Stjórn Donalds Trump Bandaríkjaforseta hefur ákveðið að frysta styrki til Harvard háskóla en styrkirnir nema í heild 2,2 milljarðum Bandaríkjadollara og dregur jafnframt til baka samninga að verðmæti 60 milljónir dala.
Aðgerðin er sögð bein afleiðing þess að háskólinn neitaði að hlýða kröfum stjórnvalda um að ráðast í róttækar breytingar á stjórnskipan og stefnu skólans og takmarka mótmæli á háskólasvæðinu.
Í yfirlýsingu frá samstarfshópi Hvíta hússins gegn gyðingahatri segir:
„Harvard hefur sýnt óásættanlega andstöðu við nauðsynlegar aðgerðir til að uppræta gyðingahatur og vernda réttindi allra nemenda. Stjórnvöld hafa því ákveðið að frysta alla langtíma fjármögnun og samninga þar til viðunandi umbætur verða gerðar.“
Hvað krefst Trump af Harvard?
Í bréfi sem sent var til Harvard á föstudag kallaði ríkisstjórnin eftir víðtækum breytingum á starfsemi skólans. Kröfurnar voru meðal annars:
• Stjórnarumbætur og breytingar á forystu
Háskólinn á að skipa nýja stjórn og endurskoða valdaskipan innan skólans.
• Ráðningar og inntökuskilyrði byggð á hæfni
Krafist er hæfnisbundinna ráðninga og inntökuferla í stað kerfa sem byggja á fjölbreytileikaskilyrðum en Harvard háskóli hefur verið meðal þeirra háskóla sem leitt hafa stefnu um að önnur skilyrði en námsárangur gildi um inngöngu í skólann sem hefur bitnað mest á nemendum af asískum uppruna.
• Alþjóðlegar inntökureglur endurskoðaðar
Sérstök áhersla lögð á að auka gegnsæi við inntöku alþjóðlegra nemenda.
• Bann við fjölbreytileikastefnu (DEI)
Skólinn á að hætta allri starfsemi sem snýr að fjölbreytileika, jafnrétti og inngildingu en samkvæmt forsetatilskipun var slíkt gert ólöglegt (DEI).
• Grímubann
Háskólinn skal banna alla notkun andlitsgríma við mótmæli, og skal brot á því banni vera í brottvísun eða tímabundinn brottrekstur.
• Skýr viðurlög og agaviðbrögð
Harvard skal rannsaka öll mótmæli síðustu tveggja skólaára og beita viðeigandi agaviðbrögðum.
• Styrkir og viðurkenningar til nemendahópa
Ekki má viðurkenna né styðja félög sem styðja eða hvetja til ofbeldis, ólöglegrar starfsemi eða áreitni.
Harvard segir nei
Í sameiginlegri yfirlýsingu frá forseta Harvard, Alan Garber, og yfirstjórn skólans, kemur fram að kröfur Trump-stjórnarinnar séu fordæmalausar og fari gegn stjórnarskrárvörðum réttindum menntastofnana.
„Við munum aldrei semja um sjálfstæði okkar eða akademískt frelsi,“ segir Garber. „Þó að sumt í erindi stjórnvalda snúi að raunverulegum áhyggjum af gyðingahatri, fela aðgerðirnar í sér aðför að menntun, rannsóknum og tjáningarfrelsi.“
Mótmæli og viðbrögð
Mótmæli blossuðu fljótt upp á háskólasvæðinu í Cambridge, þar sem nemendur og starfsfólk komu saman til að lýsa yfir stuðningi við sjálfstæði skólans.
Sumir báru skilti með textanum „Frjáls Harvard – ekki ríkisrekinn háskóli“ og „Við verjum tjáningarfrelsi allra nemenda.“
Pólitískt samhengi
Aðgerð Trumps er sú stærsta til þessa í áframhaldandi átökum milli forsetans og menntastofnana.
Hún kemur í kjölfar aukinna krafa frá Repúblikanaflokki um aðgerðir gegn því sem þeir kalla „vaxandi pólitíska slagsíðu og valdníðslu í menntakerfinu.“
Ríkisstjórnin hefur gefið til kynna að fleiri aðgerðir gætu verið í bígerð gagnvart öðrum skólum sem neiti að uppfylla sambærilegar kröfur.