Starfsmaður innan breska innanríkisráðuneytisins hefur stigið fram og haldið því fram að hælisleitendur sem hafa verið ákærðir fyrir kynferðisbrot og önnur afbrot fái engu að síður hæli í Bretlandi.
Þetta kemur fram í umfjöllun GB News.
Samkvæmt heimildarmanninum, sem starfar sem hjá innanríkisráðuneytinu, megi veita umsækjendum hæli sem hafa gerst sekir um brot sem væru innan við 12 mánaða fangelsisdómur ef þau væru framin í Bretlandi.
„Ég neitaði að samþykkja mann sem hafði afklæðst fyrir framan börn“
Í samtali við The Telegraph segir konan, sem ekki vill láta nafns síns getið, að hún hafi verið tekin fyrir af yfirmönnum sínum eftir að hafa hafnað umsókn afgansks manns sem sagður var hafa afklæðst ítrekað í leikvöllum barna.
„Ég sagði: ‘Ég ætla að hafna þessu. Hann er augljóslega hættulegur.’ En yfirmaður minn svaraði: ‘Við getum ekki hafnað Afgana, þú verður að samþykkja.’ Ég neitaði og sagði að maður sem hegðar sér svona gagnvart börnum ætti ekki að fá hæli. Þá var málið tekið af mér og fært til einhvers sem samþykkti það,“ segir hún.
Hún bætir við að ákvörðunin hafi verið réttlætt vegna þess að umsækjandinn hefði sagt að hann hafi tjáð sig gegn Talíbönum og því mætti ekki senda hann aftur heim.
Fullyrðir að starfsfólk sé undir pólitískum þrýstingi
Uppljóstrarinn segir að starfsmenn séu settir í ómögulega stöðu, þar sem þeir þurfi að velja á milli pólitísks þrýstings, fjölmiðlaumfjöllunar og eigin samvisku.
Hún segir að sumir starfsmenn fái ákveðna hvatningu til að samþykkja fleiri umsóknir, og að umsóknir frá ákveðnum ríkjum eins og Súdan og Erítreu séu afgreiddar sérstaklega án nægilegs eftirlits.
„Við erum hvött til að klára sem mest, ekki til að rannsaka málin djúpt,“ segir hún.
Innanríkisráðherra viðurkennir veikleika í kerfinu
Nýi innanríkisráðherrann Shabana Mahmood, sem tók við embætti eftir stjórnarskipti, hefur sjálf viðurkennt að hæliskerfið sé ekki í stakk búið til að anna þeim fjölda umsókna sem berast.
Hún hyggst kynna nýjar og strangari reglur um meðferð brotamanna, áfrýjunarferli og takmörkun á notkun mannréttindalaga til að hindra brottvísanir.
Samkvæmt nýjustu tölum hafa 111.000 hælisumsóknir verið lagðar fram í Bretlandi á síðustu tólf mánuðum sem er 14 prósent aukning frá árinu þar á undan.
Auk þess hafa um 37.000 manns komið til landsins ólöglega á gúmmíbátum yfir Ermarsund árið 2025, 17 prósent fleiri en á sama tíma árið áður.
Ríkisstjórnin lofar lagabreytingum
Í kjölfar ásakana hefur innanríkisráðuneytið gefið út yfirlýsingu þar sem stofnunin hafnar þeirri mynd sem dregin er upp í fjölmiðlum.
„Við tökum allar ásakanir alvarlega en samþykkjum ekki þá framsetningu sem hér er lýst,“ segir í tilkynningunni.
„Orðstír innflytjendakerfisins er okkur mikilvægur. Allar umsóknir eru meðhöndlaðar á sama hátt. Aðeins þeir sem uppfylla skilyrði fá vernd.“
Að lokum bætir ráðuneytið við að verið sé að breyta lögum þannig að einstaklingar sem dæmdir eru fyrir kynferðisbrot geti ekki lengur fengið hæli í Bretlandi, sem auðvelt væri að túlka sem staðfestingu á orðum uppljóstrarans.