Agnes M. Sigurðardóttir, biskup Íslands, ætlar ekki að tjá sig um úrskurð Kjararáðs sem færir henni 21% launahækkun, úr 1,28 milljónum á mánuði í 1,55 milljónir króna á mánuði, afturvirkt til ársbyrjunar 2017. Vegna hækkunarinnar fær Agnes 3,2 milljóna króna eingreiðslu. Í tilkynningu frá Þjóðkirkjunni segir að það sé ekki í verkahring biskups að tjá sig um hækkanirnar.
Í tilkynningunni kemur jafnframt fram að leiðréttingin eigi þó ekki að þurfa að koma á óvart eftir tólf ára kyrrstöðu. Þar segir einnig að mikil vinna hafi verið sett í að gera Kjararáði grein fyrir starfsskyldum presta og biskupa.
Yfirlýsing Biskupsstofu í heild sinni:
„Í framhaldi af úrskurði Kjararáðs um launakjör í prestastétt vill biskup Íslands að gefnu tilefni árétta að það er ekki í hans verkahring að tjá sig efnislega um niðurstöðuna. Eðlilegt er þó að benda á að um er að ræða kerfisbreytingar og launaleiðréttingar eftir tólf ára kyrrstöðu að undanskilinni kjaraskerðingu hjá prestastéttinni á árinu 2009.
Prestafélag Íslands lagði mikla vinnu í að gera kjararáði grein fyrir starfsumhverfi og starfsskyldum presta og biskupa. Á meðal þeirra gagna sem lögð voru fram var lýsing á daglegum verkefnum biskups Íslands sem hann vann að beiðni félagsins. Niðurstaða ítarlegrar skoðunar og endurmats kjararáðs á starfskjörum biskupa og presta liggur nú fyrir og þarf ekki að koma á óvart að ástæða hafi þótt til ýmissa breytinga og leiðréttinga. Að öðru leyti mun biskup Íslands ekki tjá sig um niðurstöðurnar né svara fyrirspurnum um persónulega afstöðu sína til þeirra.“