Hildur Guðnadóttir,sellóleikari og tónskáld, var í gær útnefnd sjónvarpstónskáld ársins fyrir tónlist sína í þáttunum Chernobyl. Þetta kom fram á vef Rúv.
Verðlaunin voru veitt á World Soundtrack awards sem haldin er árlega í belgísku borginni Ghent. Hildur hefur verið að skapa sér nafn í tónlistarheiminum undanfarið og hlaut meðal annars Emmy verðlaun fyrir tónlist sína í þessari sömu þáttaröð. Einnig hefur hún fengið mikið lof fyrir tónlist sína í kvikmyndinni Joker.
Í þakkarræðu sinni tileinkaði hún móður sinni verðlaunin og sagði hana hafa kennt sér snemma að tónlistin væri mikilvægari en veraldlegar eigur. Og móðir hennar hafi svo sannarlega sýnt það í verki með því að selja bílinn sinn til að fjármagna kaupin á fyrsta sellói Hildar. „Mamma, þetta er fyrir þig,” sagði Hildur að lokum og lyfti verðlaunagripnum hátt á loft.
Hún skrifaði einnig nýlega undir plötusamning við þýska útgáfurisann Deutsche Grammophon.
Hægt er að horfa á myndskeið frá verðlaunaafhendingunni með því að smella hér.