Lögreglan á höfuðborgarsvæðinu lagði í gær hald á hamar, hnúajárn og fíkniefni sem fundust í fórum barns í Breiðholti. Samkvæmt dagbók lögreglu barst tilkynning um barn undir lögaldri með vopn og vímuefni á almannafæri í hverfinu. Lögregla fann viðkomandi og gerði hald á mununum.
Málið var fært til lögreglustöðvar þar sem barnavernd kom einnig að því.
71 mál bókað – bílaþjófnaður, líkamsárás og ölvunarakstur
Í dagbók lögreglu kemur jafnframt fram að enginn hafi gist fangageymslur í nótt. Frá klukkan 17 í gær til fimm í morgun voru bókuð alls 71 mál. Þeirra á meðal var bílaþjófnaður í vesturhluta borgarinnar – bíllinn fannst fljótlega og tveir voru handteknir, málið er til rannsóknar.
Einnig var tilkynnt um minni háttar líkamsárás í miðborginni, sem nú er rannsökuð. Þá var, líkt og oft áður, umtalsvert um akstur undir áhrifum áfengis eða vímuefna – og í sumum tilvikum án ökuréttinda.