Fjölmiðlar hafa greint frá því í dag að íslenskir kjósendur vildu gefa Ítalíu 12 stig en dómnefndin setti þá í 11. sæti. Þeir fengu því aðeins fimm stig frá Íslendingum.
Að mati dómnefndarinnar voru Svíar með besta lagið, Norðmenn í öðru sæti og Lettar í því þriðja. Að mati kjósenda var hins vegar Ítalía með besta lagið, Svíar í öðru sæti og Ástralir í því þriðja.
Sjá einnig: Sex tíst sem fengu glimrandi undirtektir yfir úrslitum Eurovision
Pirrings gætir meðal fólks á samfélagsmiðlum og telja margir að þjóðin eigi að fá að ráða. Dómnefnd fer hins vegar eftir öðrum flutningi en í lokakeppninni og Einar Bárðarson, sem sat í íslensku dómnefndinni, varpaði ljósi á málið á Facebook-síðu sinni í dag.
„Ég hef séð nokkar fréttir af því í dag að dómnefndir landa Evrópu hafi gefið Svíþjóð flest stig og Ítalía hafi fengið langflest stig kjósenda Evrópu,“ segir hann.
Það er í raun ekkert skrýtið því Ítalarnir stóðu sig mjög illa á dómarakeyrslunni á föstudagskvöldið.
Einar segir að þeir ítölsku hafi svo staðið sig mun betur í lokakeppninni á laugardagskvöld.
„Ég hafði orð á því hér á Facebook í lok keppninar í gær, fyrir stigagjöfina, að Ítalirnir myndu með þeirri frammistöðu bæta sér aftur í topp baráttuna,“ segir hann.
„Það var hinsvegar eftirtektarvert að sænski drengurinn söng þetta jafn vel öll fjögur kvöldin í röð. Dómararennslið á miðvikudag var óaðfinnanlegt, það var einnig keppnisframmistaða hans á fimmtudagskvöldið sem og frammistaða hans á föstudag og laugardag.
Hann gerði þetta uppá 10 ef ekki 11 aftur og aftur án þess að svitna, hósta eða slá feilnótu einu sinni. Það er keppnis og þannig vinna menn Eurovision.“