Lögreglan á höfuðborgarsvæðinu rannsakar alvarlegt fjársvikamál þar sem íslenskur karlmaður fór á heimili eldri borgara, sagðist vera starfsmaður Microsoft og fékk aðgang að tölvu heimilisfólksins. Þar millifærði hann umtalsverða fjármuni af bankareikningum.
Þetta er ný og hættuleg þróun frá hefðbundnum „Microsoft-svindlum“, þar sem svikarar hingað til hafa aðeins hringt. Nú eru menn sendir inn á heimili fólks – hér á Íslandi.
Guðjón Rúnar Sveinsson, rannsóknarlögreglumaður hjá miðlægri rannsóknardeild Lögreglunnar á höfuðborgarsvæðinu, segir í samtali við Vísi að málið hafi komið upp í gær. Þá hafi maður, sem var gestkomandi á heimili eldri borgaranna, gripið svikahrappinn glóðvolgan. Brotaþolar sjálfir hafi verið með öllu grunlausir á meðan maðurinn komst yfir fjármuni þeirra.
Lögreglan ítrekar að starfsmenn Microsoft:
-
koma aldrei óumbeðnir á heimili,
-
óska ekki eftir aðgangi að tölvum eða bankareikningum,
-
og biðja ekki um persónulegar upplýsingar í gegnum síma.
Ef þú hefur orðið fyrir fjársvikum:
-
hafðu tafarlaust samband við bankann,
-
hringdu í lögreglu í síma 444-1000,
-
safnaðu upplýsingum um atvikið og sendu á cybercrime@lrh.is.
Málið er til rannsóknar og lögreglan hvetur alla sem kunna að hafa orðið fyrir álíka fjársvikum til að hafa samband.