Elín Birna Bjarnfinnsdóttir er eflaust heppnasta kona landsins. Hún er búin að vinna tugi vinninga á Facebook og í öðrum leikjum bara á þessu ári og í desember eru vinningarnir orðnir sex talsins. Hún hefur unnið afnot af bíl, hótelgistingu, áritaða treyju frá Alfreð Finnbogasyni og margt, margt annað.
Elín segist í samtali við Nútímann ekki hafa tölu á vinningum sem hún hefur unnið síðan hún byrjaði að taka þátt í hinum ýmsu leikjum. „Þetta eru örugglega 30 vinningar bara í Facebook-leikjum og ég hef unnið í morgun öðrum leikjum líka,“ segir hún létt.
Ég hef oft sagt það þurfi að taka þátt til að vinna. En það er bara ótrúleg heppni að vinna.
Ekkert lát er á vinningaflóði Elínar en bara í desember er hún búin að vinna í sex leikjum, tveimur á Facebook og fjórum annars staðar. Á þessu ári er hún meðal annars búin að vinna miða á tónleika, nokkur gjafabréf á veitingastaði — til dæmis í Tryggvaskála, Kaffi krús, Yellow, Hótel Selfoss og Hótel Grímsborgir, gistingu á Hótel Örk, gjafabréf í Hagkaup, nokkur gjafabréf í Lindex, ýmsa bingóvinninga, gjafabréf í fjarþjálfun, námskeið í fótbolta fyrir tvíburana sína, bækur, fullt af bíómiðum, þrjú gjafabréf í verslanir í Kringlunni, bjór og bjórglös, föt frá Ígló, miða á fótboltaleiki, heilsuúr, gjafakörfu frá Ljóma og afnot af Color Run-bílnum í viku. „Það vakti mikla lukku hérna Eyrarbakka og á Selfossi,“ segir hún.
Athugið að þetta eru vinningarnir sem hún man eftir. Og svo virðist sem vinningarnir hreinlega elti Elínu á röndum en hún vinnur meira að segja í leikjum á meðan hún er að njóta ávaxta vinninga sem hún hefur unnið. „Í desember vann ég jólamat fyrir tvo og á meðan ég og maðurinn minn vorum að borða fékk ég skilaboð um að ég hafi unnið treyju áritaða af Alfreð Finnbogasyni í leik á Facebook. Mér fannst það nokkuð gaman,“ segir hún.
Elín telur sig ekki eiga langt að sækja heppnina og bendir á þessa umfjöllun hér úr Dagblaðinu frá 1979. Þar sést þegar móðir hennar, Jóhanna Elín Þórðardóttir, vann úttekt í kaupfélaginu á Eyrarbakka í neytendaleik Dagblaðsins.
Spurð hvort hún sé jafn heppin í lottóinu segist hún hafa unnið nokkra litla vinninga og í haust vann hún 100 þúsund krónur í jókernum í Lottóinu. Þá hefur hún unnið í happdrætti SÍBS.
Elín tekur að lokum skýrt fram að hún og fjölskylda hennar vilji þakka kærlega fyrir alla vinningana.