BBC stendur nú frammi fyrir einu stærsta trúverðugleikavandamáli sínu í áratugi eftir að breska blaðið Telegraph birti innra minnisblað sem var sent til stjórnar BBC.
Höfundur skýrslunnar er Michael Prescott, fyrrverandi ráðgjafi við ritstjórnar- og siðanefnd BBC, og í henni eru dregin fram fjöldi tilvika sem hann segir sýna alvarlega og kerfisbundna hlutdrægni í fréttaflutningi stofnunarinnar.
Prescott starfaði sem einn tveggja óháðra ráðgjafa nefndarinnar í þrjú ár og segir að stjórnendur BBC hafi ítrekað hunsað alvarlegar ábendingar, jafnvel þegar um var að ræða innri greiningar frá reyndum starfsmönnum stofnunarinnar.
Í kjölfarið hefur komið fram harðorð gagnrýni á BBC frá stjórnmálamönnum og erlendum embættismönnum, ásamt því að málið er nú komið á borð breska þingsins þar sem Prescott mun gefa skýrslu.
Ræða Trump bara eitt atriði af mörgum
Eitt alvarlegasta og jafnframt þekktasta atriði minnisblaðsins snýst um að BBC Panorama hafi birt útgáfu af ræðu Donalds Trump sem skapað hafi þá mynd að hann hefði hvatt til ofbeldis þegar stuðningsmenn hans réðust inn í þinghúsið í Washington 6. janúar 2021.
En í minnisblaðinu kemur einnig fram að sérstök LGBTQ fréttadeild innan BBC hafi haft óeðlilega mikil áhrif á hvað birtist um svokölluð transmál.
Prescott segir að fréttamenn og framleiðendur úr ólíkum deildum hafi leitað til hans og lýst því mál tengd transumræðunni sem þættu erfið eða óþægileg væru kerfisbundið sniðgengin.
Hann segir að fáar fréttir hafi verið birtar um ungt fólk sem byrjar í ferli en hættir við, gagnrýni á heilbrigðisþjónustu eða málefni þar sem konur mótmæla aðgengi transfólks að kvennarýmum.
Þetta hafi verið í algjörri andstöðu við það sem aðrir stórir fjölmiðlar greindu frá á sama tíma.
Prescott bendir á að jafnvel mál sem vöktu mikla athygli á alþjóðavísu, til dæmis birting gagna sem lekið var frá World Professional Association for Transgender Health (WPATH), hafi ekki fengið umfjöllun á BBC þrátt fyrir að um þau væri fjallað í fjölmiðlum á borð við Washington Post, Economist og Times.
Óstöðugleiki í framsetningu og ruglingslegt orðalag
Minnisblaðið bendir einnig á að BBC noti hugtök á borð við: „kyni úthlutað við fæðingu“ og kynvitund með þeim hætti að telja megi að um óumdeild vísindi sé að ræða, en Prescott segir staðreyndina vera þá að þetta séu mjög umdeild hugtök.
Hann segir að þetta valdi ruglingi og geti skekkt frásögn í málum þar sem líffræðilegt kyn sé mikilvæg upplýsing, til dæmis í kynferðisbrotamálum.
Tekið er dæmi af máli Scarlet Blake, transkonu sem var dæmd fyrir morð árið 2024.
Í hádegisfréttum BBC var Blake sögð kona en ekki transkona, sem BBC viðurkenndi síðar sem mistök.
Prescott segir að slíkar villur geti verið afleiðing innri þrýstings eða óöryggis starfsmanna gagnvart viðkvæmum málefnum.
Segir kerfislægan vanda hafa fest sig í sessi
Í niðurlagi minnisblaðsins varar Prescott við því að um sé að ræða kerfislægan vanda en ekki stök mistök.
Hann segir að stjórnendur BBC hafi ítrekað sýnt að þeir vilji hvorki viðurkenna né bregðast við ábendingum um hlutdrægni, jafnvel þegar um sé að ræða mat reyndra starfsmanna stofnunarinnar.
Þetta hafi að hans mati þróast yfir í kerfislægan vanda þar sem stjórnendur verji stöðuna frekar en að laga hana.
Kallar eftir aðkomu stjórnar BBC
Prescott segir að síðasta úrræði til að rétta af stöðuna sé að stjórnin sjálf grípi inn í.
Hann segir að ritstjórnarnefndin hafi ítrekað reynt að kvarta en að framkvæmdastjórnin hafi stöðvað allar tilraunir til umbóta.
Minnisblaðið hefur valdið miklum pólitískum titringi.
Forystukona Íhaldsflokksins, Kemi Badenoch, hefur kallað eftir aðgerðum og sagðist vilja sjá fólk taka ábyrgð.
Donald Trump yngri hefur sakað BBC um óheiðarlegan fréttaflutning og aðstoðarutanríkisráðherra Ísraels hefur kallað eftir brottrekstri forstjóra BBC.
Stjórn Ofcom, breska fjarskiptaeftirlitsins, hefur jafnframt óskað eftir upplýsingum og krefst þess að ásakanirnar verði rannsakaðar.