Ásmundur Friðriksson, þingmaður Sjálfstæðisflokksins, neitar í samtali við Fréttablaðið í dag að gefa upp hversu háar upphæðir hann fékk greiddar vegna aksturs í störfum sínum fyrir Alþingi.
Sjá einnig: Kostnaðurinn við Ásmund Friðriksson borinn saman við verð á Tower Zinger-borgara á KFC
„Þið eruð ekki að spyrja hvað lögfræðingarnir frá Rauða krossinum eru að fá fyrir að senda bréf til innanríkisráðuneytisins vegna hælisleitenda, er það? Þið viljið ekki að þeir missi spón úr aski sínum?“ segir hann í Fréttablaðinu.
Þingið mælist til þess að þingmenn noti bílaleigubíla þar sem það er ódýrari kostur fyrir þingið en Ásmundur nýtir eigin bíl sem hann segir í Fréttablaðinu að sé einnig skrifstofan sín.
Í staðinn fyrir að draga Rauða krossinn í umræðuna þá hefði hann getað borið kostnaðinn við fjölmörg önnur góðgerðarfélög. Nútíminn tók saman lista.
1. Barnaspítali Hringsins
Blaðamaður Fréttablaðsins spurði Ásmund út í kostnað sem greiddur er af skattgreiðendum. Það minnsta sem Ásmundur hefði getað gert var að draga veik börn inn í þá umræðu.
2. Björgunarsveitirnar
Það kostar sitt að reka björgunarsveitirnar. Hvað með aldraða og öryrkja? Hvers eiga þeir að gjalda?
3. Mæðrastyrksnefnd
Mæður í vanda hefðu sómað sér vel í umræðunni um óhóflegan kostnað við akstur Ásmundar um kjördæmið sitt.
4. Kattholt
Kettlingar eru sætir. En það er dýrt að gefa þeim að borða.
5. Geðhjálp
Geðheilsan er verðmæt — en það er líka verðmætt að eiga skrifstofu á hjólum.