Maður í annarlegu ástandi vegna áfengisneyslu var handtekinn í Breiðholti í gærkvöldi eða nótt. Hann mun hafa valdið eignaspjöllum og síðan berað sig fyrir framan nágranna sína.
Þetta kemur fram í dagbók lögreglunnar á höfuðborgarsvæðinu. Í sama hverfi var einnig brotist inn á tannlæknastofu og maður handtekinn fyrir að ráðast á leigubílstjóra.
Í dagbókinni segir jafnframt að karl og kona hafi verið handtekin í Hafnarfirði vegna líkamsárásar og séu nú vistuð í fangaklefa.
Eldur kviknaði í þvottahúsi, eða fatahreinsun, í miðbæ Reykjavíkur. Eldurinn reyndist lítill og tókst að slökkva hann fljótt.
Í miðbænum var þremur mönnum vísað úr bílastæðahúsi eftir að þeir höfðu valdið ónæði og angrað fólk.
Tveir menn voru einnig til vandræða á veitingastað í hverfi 108. Þegar lögregla fletti þeim upp í kerfum sínum kom í ljós að annar þeirra var eftirlýstur og var hann því handtekinn.