Lögreglan á höfuðborgarsvæðinu hafði í nógu að snúast aðfaranótt laugardags. Samkvæmt dagbók hennar voru 88 mál bókuð frá klukkan 17 í gær til klukkan 5 í morgun – þar á meðal hávaðamál, ölvunarakstur, eignaspjöll og líkamsárás. Sex manns gistu fangageymslur í nótt.
Fjölmennt matarboð vakti athygli
Í Laugardalnum barst tilkynning um háreysti í fjölbýli, en þegar lögreglan kom á staðinn kom í ljós að þar fór fram stórt matarboð stórfjölskyldu – þar sem „gleðin var við völd,“ eins og segir í dagbók lögreglu.
Klósettsvefn og ber að ofan
Í miðborginni fannst maður í ölvunarsvefni á salerni hótels og var vakinn af lögreglu sem fylgdi honum á braut. Annar maður var í vandræðum fyrir utan krá og var honum ekið heim. Sá þriðji var handtekinn vegna gruns um líkamsárás.
Í Hlíðunum gekk maður ber að ofan niður akbraut. Lögregla fylgdi honum heim.
Hraðakstur og skoðunarlaus bíll
Í Miðborginni var ökumaður stöðvaður fyrir að keyra á 58 km/klst þar sem hámarkshraði er 30. Bíllinn reyndist jafnframt óskoðaður.
Ölvunarakstur og eignaspjöll víða
Í Hafnarfirði, Garðabæ og á Álftanesi voru ölvunarakstursmál áberandi. Þá barst tilkynning um grunsamlegar mannaferðir á byggingarsvæði, en enginn fannst á vettvangi.
Í Kópavogi og Breiðholti var tilkynnt um skemmdir á strætóskýli og slys þar sem maður féll af rafhlaupahjóli.
Í Mosfellsbæ var ekið á vegrið í slysi sem tengist grun um ölvunarakstur. Ökumaður var handtekinn og vistaður. Annars staðar í bænum kvörtuðu nágrannar yfir hávaða frá gleðskap sem húsráðandi sagðist ætla að lækka.