Anna Katrín Snorradóttir, sem kærði Robert Downey í sumar, hefur verið upplýst um að gögnum sem tengjast máli hennar hafi verið eytt. Anna lagði fram kæru gegn Roberts Downey vegna kynferðisbrota 5. júlí í sumar. Mál hennar er komið á borð ákærusviðs þar sem meðal annars er skoðað hvort það sé fyrnt. Fréttablaðið greinir frá þessu.
Í Fréttablaðinu er haft eftir Önnu Katrínu að hún hafi ekki fengið neinar haldbærar skýringar á eyðingu gagnanna aðrar en að langt sé síðan dæmt var í málinu og að í gögnunum gætu leynst viðkvæmar upplýsingar vegna þess að Robert var lögfræðingur.
„Ég er miður mín og trúi því ekki að þetta sé í lagi. Er í alvöru ekki mikilvægara að tryggja rétt brotaþola heldur en að varðveita lögfræðigögn? Málið er ekki fyrnt,“ segir Anna í samtali við Fréttablaðið.