Kamala Harris, fyrrverandi varaforseti Bandaríkjanna, var ein þeirra fjölmörgu sem fögnuðu þegar ljóst varð að demókratar hefðu náð meirihluta í báðum deildum Bandaríkjaþings í þingkosningunum á þriðjudag. Harris birti á X fjögurra sekúndna myndband þar sem hún hrópar „Hallelujah!“ og myndbandið fór hratt á flug.
Harris deildi um leið færslu þar sem sagði að demókratar myndu endurheimta bæði fulltrúadeildina og öldungadeildina í „sögulegri blárri bylgju“. Samkvæmt NDTV er myndbandið af Harris á fundi fyrir Jon Ossoff, öldungadeildarþingmann frá Georgíu, sem var endurkjörinn á þriðjudag.
pic.x.com/x2f0764UTL https://t.co/Vszg23sBa4
— Kamala Harris (@KamalaHarris) 4. nóvember 2026
Lokatölur liggja ekki fyrir og talningu er ekki lokið í nokkrum kjördæmum.
Obama: „Skýr skilaboð“
Barack Obama, fyrrverandi forseti, sendi frá sér langa yfirlýsingu á X. „Í kvöld sendi bandaríska þjóðin skýr skilaboð – hún vill stjórnmál sem sameina fólk frekar en sundra því, og leiðtoga sem bjóða raunhæfar lausnir á þeim vanda sem hún glímir við,“ skrifaði Obama.
Obama þakkaði frambjóðendum sem buðu sig fram „í öllum landshlutum – líka þar sem sigur þótti áður fjarlægur“. Hann þakkaði einnig starfsfólki og sjálfboðaliðum beggja flokka sem sáu um framkvæmd kosninganna.
„Þótt þessi ríkisstjórn eigi tvö ár eftir í embætti er verkefni okkar nú að bretta upp ermar, gera breytingar alls staðar þar sem við höfum vald til þess, koma í veg fyrir frekari skaða og leggja grunn að framtíðinni,“ skrifaði hann að lokum.
Tonight, the American people sent a clear message – they want a politics that brings people together rather than divides them, and leaders who offer concrete solutions to the challenges they face.
— Barack Obama (@BarackObama) 4. nóvember 2026
„Nú hefst rauða brúðkaupið“
Spjallþáttastjórnandinn Jimmy Kimmel fór yfir úrslitin í upphafsræðu sinni í Jimmy Kimmel Live! á þriðjudagskvöld. „Það sem við vitum fyrir víst er að demókratar hafa formlega náð fulltrúadeildinni,“ sagði Kimmel og bætti við: „Bláa bylgjan er komin að landi og nú hefst rauða brúðkaupið.“ Þar vísaði hann í frægt fjöldamorð í þáttunum Game of Thrones.
Kimmel gerði líka grín að nýlegum ummælum Trumps um afturenda annarra. „Eftir allt talið um rassinn á Nicki Minaj og rassinn á Jon Husted… er eini rassinn sem Trump hugsar um í kvöld sá sem hann var að fá á baukinn,“ sagði hann.
„Draumar rætast“
Leikarinn Henry Winkler, sem flestir þekkja sem Fonzie úr Happy Days, svaraði færslu á X þar sem spurt var hvernig fólki liði. „Draumar rætast,“ skrifaði Winkler.
Dreams do come true https://t.co/hlboEbDthM
— Henry Winkler (@hwinkler4real) 4. nóvember 2026
Söngkonan Bette Midler skrifaði á Instagram: „Ég er í skýjunum! Þvílíkt frábært kvöld. Takk, Ameríka! Þið hafið bjargað ástkæra landinu ykkar!!“ að því er Independent greinir frá.
Samkvæmt Billboard fylgdist leikkonan Mandy Moore grannt með talningunni á Instagram og skrifaði meðal annars: „Texas, þetta verður bara betra og betra…“ Leikararnir John Leguizamo, Alyssa Milano og Molly Ringwald og spjallþáttastjórnandinn Stephen Colbert eru á meðal annarra sem fögnuðu á samfélagsmiðlum.
Donald Trump, forseti Bandaríkjanna, kenndi því hins vegar um að hann hefði ekki sjálfur verið á kjörseðlinum.
„Ef ég hefði verið á kjörseðlinum hefðum við unnið stórsigur“ – Trump kennir öðrum um ósigurinn