Norðmenn hafa rakað til sín að minnsta kosti 8,6 milljörðum króna (8.602.900.000 kr.) í verðlaunafé í Víkinglottó það sem af er ári, samkvæmt útreikningum Nútímans. Norskur miðaeigandi var einn með alla tölurnar ásamt víkingatölunni í Víkinglottó í kvöld. Hann fékk í sinn hlut rúmlega 4,2 milljarða króna.
Tveir heppnir Norðmenn hófu árið með látum og fengu hvor um sig 111 milljónir í Víkinglottó í byrjun árs. Heppinn Norðmaður var aftur á ferð í lok janúar þegar hann og Dani fengu hvor um sig 58,3 milljónir í sinn hlut í fyrsta vinning. Heppni Norðmaðurinn var aftur á ferð í febrúar þegar hann skipti fyrsta vinningi með Dana og fengu þeir hvor um sig 170 milljónir króna.
Í lok febrúar voru tveir heppnir Norðmenn á ferð. Þeir skiptu fyrsta vinningi með sér og fengu hvor um sig 55,6 milljónir króna. Tveir heppnir Norðmenn voru svo í hópi þriggja vinningshafa í byrjun mars. Allir fengu 74 milljónir króna í sinn hlut. Heppni Norðmaðurinn hélt uppteknum hætti viku síðar þegar hann var með allar aðaltölurnar réttar og fékk rúmlega 111 milljónir í sinn hlut.
Í apríl var heppinn Norðmaður einn af þremur sem skiptu með sér fyrsta vinningi. Hver þeirra fékk 30 milljónir í sinn hlut. Heppnu Norðmennirnir voru tveir viku síðar og fengu hvor um sig um 61 milljón í fyrsta vinning. Heppni Norðmaðurinn var svo extra heppinn um miðjan apríl þegar hann var með allar tölurnar ásamt því að hin svokallaða ofurtala lét sjá sig. Okkar maður fékk því rúmlega 2,8 milljarða í sinn hlut. Apríl var góður mánuður fyrir heppna Norðmanninn sem var með allar tölurnar í lok apríl og fékk rúmlega 92 milljónir króna.
Í byrjun maí var heppinn Norðmaður svo með allar tölurnar réttar og fékk í sinn hlut um 267 milljónir króna. Viku síðar var heppinn Norðmaður aftur á ferð og var með allar aðaltölurnar réttar. Hann fékk litlar 86 milljónir í sinn hlut. Það var svo ekki fyrr en í seinnihluta júní sem heppinn Norðmaður var aftur á ferð. Þá voru þeir reyndar tveir og skiptu með sér fyrsta vinningi, fengu hvor um sig 27 milljónir í sinn hlut.
Í lok júlí fékk svo heppinn Norðmaður 2. vinning og um 30 milljónir króna í sinn hlut. Viku síðar skipti heppni Norðmaðurinn svo 2. vinningi með Íslendingi. Hvor um sig fékk 15,4 milljónir í sinn hlut. Heppinn Norðmaður fékk svo 2. vinning, um 160 milljónir króna í lok ágúst.