Kjúklingurinn á KFC gæti klárast á næstu dögum ef verkfall félagsmanna BHM í Dýralæknafélagi Íslands heldur áfram mikið lengur.
Slátrun hefur nú legið niðri í rúmar tvær vikur en lítið er til af ferskum kjúklingi á landinu og hratt gengur á birgðir af frosnum afurðum. Þetta kemur fram á mbl.is.
Kristín Helgadóttir, framkvæmdastjóri KFC á Íslandi, segir í samtali við mbl.is að KFC verði opið fram á sunnudag og að til sé kjúklingur út þann tíma.
Kjúklingabitarnir klárast um helgina ef ekkert breytist. Þetta er óviðunandi. Við erum með átta veitingastaði og frekar einhæf þar sem við notum bara kjúklingakjöt. Við þurfum jafnvel að fara að loka ef ekkert leysist.
Hún segir á mbl.is að borgarar og lundir verði áfram til en að bitarnir klárist hratt.
„Þeir eru að verða búnir. Það er hins vegar erfitt að vita nákvæmlega hvernig fer. Allir sem selja kjúkling eru nú að fara ofan í frystinn og tæma. Maður veit því ekki alveg hvað er til.“