Sigurður Ragnar Eyjólfsson, fyrrverandi landsliðsþjálfari kvenna í knattspyrnu og fræðslustjóri Knattspyrnusambands Íslands, sagðist í færslu á Facebook-síðu sinni í gær hafa sannfært stjórnendur KSÍ um að Lars Lagerbäck ætti að taka við þjálfun íslenska karlalandsliðsins fyrir fjórum árum síðan.
Færslan hefur vakið mikla athygli en Sigurður segir að stjórnendur KSÍ hafi verið komnir í viðræður við Roy Keane, fyrrverandi leikmann Manchester United, þegar honum tókst að beina athyglinni að Svíanum.
„Að lokum tóku Geir og Þórir auðvitað lokaákvörðunina og hún var að sjálfsögðu hárrétt og farsæl og þeim ber að hrósa fyrir það. Engan veginn ætla ég að eigna mér þessar ákvarðanir, þær voru auðvitað Geirs og Þóris og stjórnenda KSÍ,“ segir Sigurður Ragnar í pistli sínum.
Taktu prófið! Hversu vel þekkirðu Lars Lagerbäck?
Íþróttafréttamaðurinn Henry Birgir Gunnarsson benti á dögunum á viðtal sem hann tók við Lagerbäck í september árið 2011 þar sem sá sænski sagðist vera til í viðræður við KSÍ.
Henry segir á Facebook-síðu sinni að Lagerbäck hafi verið hissa á að heyra í sér. „KSÍ ákvað svo að hringja í hann eftir þetta viðtal. The rest is history. Ótrúlegt,“ segir hann.
Í ummælum við þessa færslu Henrys stígur fram Kolbeinn Tumi Daðason, fréttastjóri Vísis og fyrrverandi íþróttafréttamaður á Fréttablaðinu. Hann bendir á viðtal sem hann tók við Lagerbäck fyrir vefinn Sammarinn.com í janúar árið 2010.
Viðtalinu lýkur á því að Lagerbäck er spurður hvort það kæmi til greina að taka við þjálfun íslenska landsliðsins. „Ekki spurning!“ svarar hann.